သျှမ်းပြည်နယ်တောင်ပိုင်း ဆီဆိုင်မြို့နယ်အတွင်း PNLA+PDF ပူးပေါင်းအဖွဲ့နှင့် စစ်ကောင်စီ+PNO ပူးပေါင်းအဖွဲ့တို့သည် ယနေ့ (၂၆.၁.၂၀၂၄)ရက်နေ့ နံနက်ပိုင်းအထိ တိုက်ပွဲပြင်းထန်စွာဖြစ်ပွားလျက်ရှိပြီး စစ်ကောင်စီဘက်မှ လေကြောင်းတိုက်ခိုက်မှုနှင့် လက်နက်ကြီးပစ်ခတ်တိုက်ခိုက်မှုပြုလုပ်လျက်ရှိကြောင်း သတင်းရရှိသည်။
“ဆီဆိုင်ထဲမှာတော့ PNLA+PDF တွေက နေရာတော်တော်များကို ထိန်းချုပ်လိုက်ပြီလို့ ပြောလို့ရတယ်။ ဒါပေမယ့် စစ်ကောင်စီတပ်နဲ့ PNO တွေလည်း အင်အားတွေဖြည့်ပြီး ပြန်တိုက်နေတယ်။ မနေ့ညကဆိုရင်လည်း လေယာဉ်တွေနဲ့ ဗုံးကြဲတိုက်ခိုက်တာတွေရော လက်နက်ကြီးနဲ့ပစ်တာတွေရောရှိတယ်။ ဆီဆိုင်မြို့ထဲက လူနေအိမ်တွေထိခိုက်ပျက်စီးတာတွေ အများကြီးရှိတယ်။ အချို့ပြည်သူတွေ လက်နက်ကြီးကျည်ထိမှန်တာတွေရှိတယ်။ တောင်ကြီးဘက်က လူမှုကူညီရေးအသင်းတွေက ဆီဆိုင်ထဲပိတ်မိနေတဲ့သူတွေကို ခေါ်ထုတ်ပေးနိုင်သလောက် ခေါ်ထုတ်နေတယ်။ ထိခိုက်ပျက်စီးမှု စာရင်းအတိအကျတော့ မသိရသေးဘူး။” ဆီဆိုင်မြို့နယ် ဒေသခံတစ်ဦးက ပြောပြသည်။
ယနေ့ နံနက်ပိုင်းတွင် တောင်ကြီးမြို့မှ စစ်တပ်ရဟတ်ယာဉ်များဖြင့် စစ်ကောင်စီမှ စစ်ကူများပို့ဆောင်လျက်ရှိသလို PNO အဖွဲ့ကလည်း ဆီဆိုင်မြို့နယ် အရှေ့ဘက်လွယ်ပွတ်ကျေးရွာအုပ်စုဆီ ချည်းကပ်လျက်ရှိကြောင်း ဒေသခံများက ပြောသည်။ ဒါ့အပြင် စစ်ကောင်စီတပ်မှလည်း စစ်ကား (၁၀) စီးကျော်ခန့်ဖြင့် အင်အားအပြည့်ဖြည့်ကာ လွယ်ပွတ်ကျေးရွာအုပ်စုထံ ချီတက်လျက်ရှိသည်ဟုဆိုသည်။ လက်ရှိအချိန်အထိ ဆီဆိုင်-ဆိုက်ခေါင် တစ်လျောက် ဒေသခံအများအပြား တောင်ကြီး၊ ဟိုပုံး စသည့်မြို့များထံ ထွက်ပြေးတိမ်းရှောင်နေကြောင်း သိရသည်။
