သျှမ်းပြည်မြောက်ပိုင်း သီပေါမြို့နယ်နဲ့ နမ္မတူမြို့နယ် ဆက်သွယ်ထားတဲ့ မိုးတေတံတား မိုင်းခွဲဖျက်ဆီး ခံရတယ်လို့ SSPP က ယနေ့မွန်းလွဲပိုင်းမှာ ထုတ်ပြန်ထားပါတယ်။
သီပေါမြို့နယ်နဲ့ နမ္မတူမြို့နယ်ကို ဆက်သွယ်ထားတဲ့ နမ္မတူချောင်းပေါ်ရှိ မိုးတေတံတားဟာ ယမန်နေ့ ည ၈ နာရီကျော် အချိန်မှာ မိုင်းခွဲဖျက်ဆီးခံရပြီး တံတား၏ အလယ်နေရာတွင် ကျိုးကျပျက်စီး သွားတယ်လို့ ရေးသားဖော်ပြထားပါတယ်။
၎င်းထုတ်ပြန်ထားတဲ့ထဲမှာ “မိုင်းခွဲသံတော့ တော်တော်ကျယ်တယ် ၅ ချက်လောက်ကြားရတယ်၊ အဲ့ချိန် လေယာဉ်တွေ ဒရုန်းတွေတော့ မလာဘူး” လို့ မြေပြင်သတင်းရင်းမြစ်ရဲ့ ပြောဆိုချက်ပါရှိပါတယ်။
လက်ရှိအချိန်မှာ ၎င်းနေရာကို ဖြတ်သန်းသွားလာရေးအတွက် တအာင်းအမျိုးသား လွတ်မြောက်ရေး တပ်ဖွဲ့(TNLA) မှ စက်လှေနဲ့ ပို့ဆောင်ပေးနေတယ်လို့ဆိုပါတယ်။
မိုးတေချောင်းတံတားဟာ သီပေါ၊ နမ္မတူ၊ မန်တုံ၊ နမ့်ဆန်မြို့ကို အဓိက ဆက်သွယ်ထားတဲ့ တံတားဖြစ်ပြီး ဒီတံတားကို ဘယ်အဖွဲ့အစည်းက ဖောက်ခွဲဖျက်ဆီးတယ်ဆိုတာ Hsan Loi Voice အနေနဲ့ သီးခြားအတည်ပြုနိုင်ဖို့ စုံစမ်းနေဆဲဖြစ်ပါတယ်။
စစ်တပ်ထောက်ခံ တယ်လီဂရမ်ချန်နယ်မှာတော့ သီပေါဒေသရှိ မိုးတေတံတားကို TNLA က မိုင်းခွဲဖျက်ဆီးသွားတယ်လို့ ဝါဒဖြန့်ရေးသားထားပါတယ်။
မိုးတေတံတားဟာ ပြီးခဲ့တဲ့ ၂၀၂၃ ခုနှစ် ဒီဇင်ဘာလ ၂၈ ရက်က မိုင်းခွဲဖျက်ဆီးခံခဲ့ရပြီး ယခု ဒုတိယအကြိမ် မိုင်းခွဲဖျက်ဆီးခံရတာပဲဖြစ်ပါတယ်။