ယမန်နေ့ ဧပြီလ (၁၂) ရက်နေ့ နံနက်အစောပိုင်းတွင် သျှမ်းပြည်နယ်မြောက်ပိုင်း သီပေါမြို့ ပန်းတိမ်မြောက်ရပ်ကွက်ရှိ ရွှေချိန်ခွင် ရွှေဆိုင်ကို လူ(၄)ဦးက ဓားပြဝင်တိုက်ခဲ့သည်။
ဒေသခံတစ်ဦး၏ ပြောပြချက်အရ ဓားပြ(၄) ဦးက ကားဖြင့်ရောက်လာပြီး (၁)ဦးက ကားပေါ်စောင့်ကာ ကျန်(၃)ဦးက ဆိုင်အတွင်း ဓားပြဝင်တိုက်သွားခြင်းဖြစ်သည်။ ဓားပြများတွင် ပစ္စတိုသေနတ်ကိုယ်စီကိုင်ဆောင်ထားကြပြီး ဆိုင်အတွင်းရှိ မှန်ဘောင်များအား ရိုက်ခွဲကာ ရွှေထည်ပစ္စည်းများနှင့် ငွေသား ကျပ်သိန်း(၁၀၀) ကျော် ယူဆောင်သွားသည်။
“ ဓားပြတွေက ကားတစ်စီးနဲ့ရောက်လာပြီး (၃) ယောက်က ဆိုင်ထဲကိုဓားပြဝင်တိုက်နေတဲ့အချိန် ကားမောင်းတဲ့တစ်ယောက်က ဈေးထောင့်မှာ ကားစက်နှိုးထားပြီး အသင့်စောင့်နေတာ။ ဓားပြတိုက်တဲ့အချိန် မြို့ထဲလည်း ဆူညံနေတာကတစ်မျိုး ဓားပြတွေက ဆိုင်ရှင်ကိုသေနတ်တွေနဲ့ ထောက်ထားပြီး တိုက်တာဆိုတော့ ရွှေအများကြီးရသွားတယ်။ ဒီနေ့ တော့ ဆိုင်ရှင်နဲ့နီးစပ်တဲ့သူတွေပြောသံကြားတာတော့ ရွှေထည်ပစ္စည်းပဲကို သိန်းတစ်သောင်းကျော်ပါသွားတယ်ပြောတယ်။” ဟု သီပေါဒေသခံတစ်ဦးက ပြောပြသည်။
သျှမ်းပြည်နယ်မြောက်ပိုင်း သီပေါမြို့တွင် စစ်ကောင်စီအဖွဲ့အပါအဝင် TNLA နှင့် SSPP အဖွဲ့စသည့် အဖွဲ့ပေါင်းစုံရှိနေသည့်ကြားက ယခုလို ဒုစရိုက်မှုကို ပေါ်ပေါ်ထင်ထင်ကျူးလွန်နေခြင်းဖြစ်သည်။