သျှမ်းပြည်နယ်မြောက်ပိုင်း သီပေါမြို့ရှိ စစ်ကောင်စီတပ်များအား စစ်ဆင်ရေး ၁၀၂၇ ဒုတိယပိုင်းကတည်းက TNLA နှင့် တော်လှန်ရေးအင်အားစုများ စတင်တိုက်ခိုက်ခဲ့ပြီး ယနေ့တွင် စစ်ကောင်စီ၏ ခလရ – ၂၃ တပ်တစ်ခုသာ ကျန်ရှိနေတော့ကြောင်း သိရသည်။ သီပေါမြို့ရှိ စစ်ကောင်စီတပ်၏ ခမရ -၅၀၃ နှင့် ခမရ – ၅၀၄ တပ်များအား တော်လှန်ရေးအင်အားစုများက စက်တင်ဘာလ (၂၇) ရက်နေ့တွင် အပြီးတိုင် သိမ်းပိုက်ရရှိခဲ့သည်။
“မြို့ထဲမှာတော့ TNLA က နေရာတော်တော်များများမှာ နေရာယူထားပြီးတော့ လူတွေလည်း စားသောက်စရာတွေ ထွက်ဝယ်ကြတာတွေရှိတယ်။ ဖုန်းလိုင်းနဲ့အင်တာနက်လိုင်းတော့ မရဘူး။ လျှပ်စစ်မီးလည်း ပြန်မရသေးဘူး။ စစ်ကောင်စီတပ်ရဲ့ ခလရ – ၂၃ တစ်ခုပဲကျန်တော့တယ် အဲ့ဒါကို တော်လှန်ရေးအဖွဲ့တွေရသွားရင် သီပေါမှာ စစ်ကောင်စီတပ်တွေလုံးဝမရှိတော့ဘူး။ ခလရ ၂၃ မကျဖို့အတွက်တော့ စစ်ကောင်စီဘက်ကနေ လေကြောင်းပစ်ကူနဲ့ လက်နက်ကြီးတွေကို ရမ်းသမ်းပစ်နေတုန်းပဲ။” ဟု သီပေါမြို့ခံတစ်ဦးက ပြောပြသည်။
သီပေါမြို့အဝင်အထွက်များတွင် TNLA နှင့် MNDAA အဖွဲ့များက နေရာယူထားပြီး မြို့တွင်းထဲတွင် TNLA က နေရာယူထားသည်ဟု သိရသည်။