စစ်အုပ်စုက ဧပြီလ ၁၇ ရက်နေ့မှာ ပြန်လည်လွှတ်ပေးခဲ့တဲ့ သမ္မတ ဦးဝင်းမြင့် အား အမျိုးသားညီညွတ်ရေးအတိုင်ပင်ခံကောင်စီ (NUCC) က ကြိုဆိုနှုတ်ခွန်းဆက် သဝဏ်လွှာပေးပို့လိုက် ပါတယ်။
သမ္မတ ဦးဝင်းမြင့် အနေဖြင့် ကျန်းမာစွာ မိသားစုနဲ့ ပြန်လည်ဆုံးဆည်းရတာကို ပြည်သူနဲ့အတူ ထပ်တူများစွာ ဝမ်းမြောက်ရတယ်လို့ NUCC ရဲ့ သဝဏ်လွှာမှာ ဖော်ပြထားပါတယ်။
နိုင်ငံတော်သမ္မတ ဦးဝင်းမြင့် က ပြည်သူလူထုမှ ဒီမိုကရေစီ နည်းလမ်းကျ အပ်နှင်းထားတဲ့ နိုင်ငံတော် သမ္မတ တာဝန်ထမ်းဆောင်နေစဉ် အကြမ်းဖက် စစ်အုပ်စုရဲ့ ၎င်းတို့ကိုယ်တိုင် ရေးဆွဲထားတဲ့ ၂၀၀၈ ဖွဲ့စည်းပုံ အခြေခံဥပဒေကို ချိုးဖောက်ကာ နိုင်ငံတော်ပုန်ကန်မှု ကျူးလွန်ပြီး မတရားဖမ်းဆီး ချုပ်နှောင်မှုကို ခံခဲ့ရတာဖြစ်တယ်လို့ ဖော်ပြထားပါတယ်။
ဒါ့အပြင် လူထုခေါင်းဆောင် ဒေါ်အောင်ဆန်းစုကြည် နဲ့တကွ ကျန်ရှိနေတဲ့ နိုင်ငံရေး အကျဥ်းသားများ အားလုံး လွတ်မြောက်ဖို့အတွက် NUCC အနေနဲ့ ဆက်လက်ကြိုးပမ်းသွားမယ်လို့ ဆိုပါတယ်။
င်ငံတော် သမ္မတ ဦးဝင်းမြင့် ကို မြန်မာနိုင်ငံရဲ့ သမ္မတဖြစ်တယ်လို့ အမျိုးသားညီညွတ်ရေးအတိုင်ပင်ခံ ကောင်စီက တရားဝင် ဆက်လက်အသိအမှတ်ပြု ထားဆဲဖြစ်တယ်လို့ ဖော်ပြထားပါတယ်။NUCC အနေနဲ့ စစ်အာဏာရှင်စနစ် အပါအဝင် အာဏာရှင် စနစ်မှန်သမျှ ပပျောက်ရေးနဲ့ ဖက်ဒရယ် ဒီမိုကရေစီ ပြည်ထောင်စု တည်ဆောက်ရေး တို့အတွက် ပြည်သူတရပ်လုံး၊ တော်လှန်ရေး အင်အားစု အားလုံးနှင့် အတူလက်တွဲပြီး နွေဦးတော်လှန်ရေး အောင်ပွဲရတဲ့အထိ ဆက်လက်တိုက်ပွဲဝင်သွားမယ်လို့ အသိပေးဖော်ပြထားပါတယ်။
သမ္မတ ဦးဝင်းမြင့် ဟာ စစ်တပ်အာဏာသိမ်းတဲ့ ၂၀၂၁ ခုနှစ် ဖေဖော်ဝါရီလ ၁ ရက် နံနက်အစောပိုင်း ကတည်းက ဖမ်းဆီးခံခဲ့ရတာဖြစ်ပြီး အဂတိအမှု ၄ မှုအပြင် ပုဒ်မ ၁၃၀−က တို့နဲ့ စုစုပေါင်း ထောင်ဒဏ် ၉ နှစ်နှင့် ၆ လ ကျခံရတာဖြစ်ပြီး ယခု ကျန်ရှိတဲ့ ပြစ်ဒဏ်တွေကို လျော့ပေါ့ပေးပြီး လွတ်ငြိမ်း ချမ်းသာခွင့်ပေးခဲ့ခြင်းဖြစ်ကြောင်း စစ်အုပ်စုက ယမန်နေ့က ထုတ်ပြန်ကြေညာပါတယ်။