ကာလကြာရှည်စွာ ကြိုးစားရယူခဲ့ရတဲ့ လွတ်လပ်ရေးဟာ လွဲမှားသည့် အတွေးအခေါ်၊ အယူအဆနှင့် လုပ်ဆောင်ချက်တွေကြောင့် တစ်ခဏအတွင်း လက်လွှတ်ဆုံးရှုံးရနိုင်သည်ကို ယခုအချိန်ကာလမျိုးမှာ သတိမူရမယ်လို့ စစ်ခေါင်းဆောင် မင်းအောင်လှိုင် ရဲ့ (၇၆)နှစ်မြောက် လွတ်လပ်ရေးနေ့အခမ်းအနားသို့ ပေးပို့တဲ့ သဝဏ်လွှာမှာ ဖော်ပြထားပါတယ်။
ဒါ့အပြင် နယ်ချဲ့တို့ရဲ့ သွေးခွဲအုပ်ချုပ်မှုကြောင့် ပေါ်ပေါက်လာတဲ့ လက်နက်ကိုင်လမ်းစဥ် ချုပ်ငြိမ်းစေရန် ခေတ်
အဆက်ဆက်အစိုးရများက နည်းလမ်းမျိုးစုံနဲ့ ကြိုးပမ်းဆောင်ရွက်ခဲ့ပြီး လူမျိုးစွဲ၊ ဝါဒစွဲ၊ အတ္တစွဲ နှင့် ကိုယ်ကျိုးစီးပွား ရှေ့တန်းတင်မှုတို့ကြောင့် နိုင်ငံတော်မှာ လက်နက်ကိုင်ပဋိပက္ခများ၊ အကြမ်းဖက် တိုက်ခိုက်မှုများကြောင့် နိုင်ငံပိုင် အခြေခံအဆောင်အအုံများနဲ့ ပြည်သူများရဲ့ အသက်အိုးအိမ် ပျက်စီး ဆုံးရှုံးမှုများ ကြုံတွေ့ခဲ့ရတယ်လို့ ဆိုပါတယ်။
လက်နက်စွဲကိုင်ပြီး မဖြစ်သင့်မဖြစ်ထိုက်တာများ တောင်းဆိုးပြီး မိမိတို့၏ ဆန္ဒကိုသာ ရှေ့တန်းတင် ဦးစားပေးဆောင်ရွက်နေမှုသည် ပြည်သူလူထုကို ဆင်းရဲတွင်း နက်စေရန် ဆောင်ရွက်နေခြင်းသာ ဖြစ်တယ်လို့ သဝဏ်လွှာမှာဖော်ပြထားပါတယ်။
ဒါကြောင့် တိုင်းရင်းသားပြည်သူတစ်ရပ်လုံးက လွတ်လပ်ရေးကြီး အတွန့်ရှည်ကြာ တည်တံ့ခိုင်မြဲစေရန် အလိုအပ်ဆုံးနဲ့ အဖြစ်သင့်ဆုံးဖြစ်တဲ့ ဒို့တာဝန်အရေး ၃ ပါးကို အမျိုးသားရေးရည်မှန်းချက်၊ အမျိုးသား ရေးတာဝန်အဖြစ် လေးနက်စွာခံယူပြီး အစဥ်တစိုက် ထိန်းသိမ်းစောင့်ရှောက်သွားဖို့ စစ်ခေါင်းဆောင် က တိုက်တွန်းထားပါတယ်။
ယနေ့အချိန်အခါမှာ မိမိတို့နိုင်ငံရဲ့ ပကတိလိုအပ်ချက်သည် လက်နက်ကိုင်လမ်းစဥ်ချုပ်ငြိမ်းပြီး နိုင်ငံတစ်ဝန်း ထာဝရငြိမ်းချမ်းရေးပင်ဖြစ်ပြီး ပြည်ထောင်စုကြီးအတွင်း အယူအဆလွဲမှားမှုများကြောင့် ငြိမ်းချမ်းရေးကို ထိခိုက်ပျက်စီးစေသဖြင့် ပြည်ထောင်စုငြိမ်းချမ်းရေး လုပ်ငန်းစဥ်များမှာ ပတ်သက် ဆက်နွယ်သူများအားလုံး က အပြုသဘောဖြင့် ပါဝင်ရန် လိုအပ်တယ်လို့ ဆိုပါတယ်။
ထာဝရငြိမ်းချမ်းရေးအတွက် NCA ပါ ကတိကဝတ်များအတိုင်း လေးစားလိုက်နာပြီး သက်ဆိုင်သူများ အားလုံး ပူးပေါင်းဆောင်ရွက်ကြရမှာဖြစ်ပြီး ရေရှည်တည်တံ့ခိုင်မြဲပြီး ဟန်ချက်ညီတဲ့ ဖွံ့ဖြိုးတိုးတက်မှု များကို ဖော်ဆောင်နိုင်ဖို့ အမျိုးသားစည်းလုံးညီညွတ်ရေးနှင့် ပြည်ထောင်စုငြိမ်းချမ်းရေးကို ဦးတည် ကြိုးပမ်းဆောင်ရွက်ကြပါရန် စစ်ခေါင်းဆောင်က လွတ်လပ်ရေးနေ့မှာ ပေးပို့တဲ့ သဝဏ်လွှာမှာ တိုက်တွန်းထားပါတယ်။