တည်ဆဲဥပဒေတခုခုနဲ့ ပြစ်မှုကျူးလွန်ပြီး ပြစ်ဒဏ်ချမှတ်ခံရတဲ့ အကျဥ်းသားတွေကို ပြစ်ဒဏ်၏ ၆ ပုံ ၁ ပုံကို လွတ်ငြိမ်းသက်သာခွင့်ပြု
စစ်အုပ်စုက ဒီကနေ့ ဇန်နဝါရီ ၄ ရက်မှာ ကျရောက်တဲ့ (၇၈) နှစ်မြောက် လွတ်လပ်ရေးနေ့ အထိမ်းအမှတ်ဆိုပြီး နိုင်ငံတစ်ဝန်းရှိ အကျဉ်းထောင်၊ အချုပ်ထောင်၊ စခန်းအသီးသီးမှာ ပြစ်ဒဏ် ကျခံနေရတဲ့ အကျဉ်းသား/သူ ၆၁၃၄ ဦးနဲ့ နိုင်ငံခြားသား အကျဉ်းသား/သူ ၅၂ ဦးတို့ကို ပြစ်ဒဏ် လွတ်ငြိမ်းခွင့်ပေးလိုက်တယ်လို့ စစ်ကော်မရှင်က ယနေ့မှာ ထုတ်ပြန်ကြေညာပါတယ်။
ရာဇဝတ်ကျင့်ထုံး ဥပဒေပုဒ်မ ၄၀၁၊ ပုဒ်မခွဲ (၁) အရ နောက်တစ်ကြိမ် ပြစ်မှုထပ်မံကျူးလွန်ပါက ၎င်း ပြစ်ဒဏ်အပြင် ယခုကျခံဖို့ ကျန်ရှိတဲ့ ပြစ်ဒဏ်တွေကိုပါ ဆက်လက် ကျခံရမယ်ဆိုတဲ့ စည်းကမ်း သတ်မှတ်ချက်နဲ့ ပြစ်ဒဏ်လွတ်ငြိမ်းခွင့် ပြုလိုက်တာဖြစ်ပြီး နိုင်ငံခြားသား အကျဥ်းသား/သူ ၅၂ ဦးကို လည်း ပြည်နှင်ဒဏ်ပေးလိုက်တယ်လို့ ထုတ်ပြန်ချက်ထဲမှာ ဖော်ပြထားပါတယ်။
ဒါ့အပြင် တည်ဆဲဥပဒေတစ်ရပ်ရပ်နဲ့ ပြစ်မှုကျူးလွန်ပြီး ပြစ်ဒဏ်ချမှတ်ခံရတဲ့ အကျဥ်းသားတွေကို သူတို့ ကျခံရန် ကျန်ရှိတဲ့ ပြစ်ဒဏ်ရဲ့ ၆ ပုံ ၁ ပုံကို လွတ်ငြိမ်းသက်သာခွင့်ပြုလိုက်တယ်လို့ ဆိုထားပြီး အကျဥ်းသားအရေအတွက်ကိုတော့ ဖော်ပြမထားပါဘူး။
လွတ်ငြိမ်းသက်သာခွင့် ရရှိသူတွေထဲမှာ ၂၀၂၆ ခုနှစ်၊ ဇန်နဝါရီ ၄ ရက် မတိုင်မီ လူသတ်မှု၊ မုဒိမ်းမှု၊ ပေါက်ကွဲ စေတတ်တဲ့ ဝတ္ထုပစ္စည်းများ အက်ဥပဒေအရ ပြစ်မှုများ၊ မတရားအသင်းများအက်ဥပဒေအရ ပြစ်မှုများ၊ ၁၈၇၈ ခုနှစ် လက်နက်များ အက်ဥပဒေအရ ပြစ်မှုများ၊ ၁၉၄၉ ခုနှစ် လက်နက်ဥပဒေအရ ပြစ်မှုများ၊ ၁၉၂၄ ခုနှစ် ရှမ်းပြည်နယ်လက်နက်အမိန့်အရ ပြစ်မှုများ၊ မူးယစ်ဆေးဝါးနှင့် စိတ်ကို ပြောင်းလဲစေတတ်သော ဆေးဝါးများဆိုင်ရာ ဥပဒေအရ ပြစ်မှုများ၊ သဘာဝဘေး အန္တရာယ်ဆိုင်ရာ စီမံခန့်ခွဲမှု ဥပဒေအရ ပြစ်မှုများ၊ အကြမ်းဖက်မှု တိုက်ဖျက်ရေးဥပဒေအရ ပြစ်မှုများနဲ့ အဂတိလိုက် စားမှု တိုက်ဖျက်ရေး ဥပဒေအရ ပြစ်မှုများမှ အပ တည်ဆဲဥပဒေတစ်ရပ်ရပ်နဲ့ ပြစ်မှုကျုးလွန်းပြီး ပြစ်ဒဏ်ကျခံနေရသူတွေ ဖြစ်တယ်လို့ ဖော်ပြထားပါတယ်။