သျှမ်းပြည်နယ်မြောက်ပိုင်း လားရှိုးမြို့အား မြောက်ပိုင်းမဟာမိတ်အဖွဲ့က ဝင်ရောက်သိမ်းပိုက်မည်ဟူသော သတင်းများကြောင့် ဒေသခံများစွာ နေ့စဉ်နေ့တိုင်း ထွက်ပြေးတိမ်းရှောင်နေကြကြောင်း သိရသည်။
ထိုအထဲတွင် စစ်ကောင်စီတပ်ဝင်းအတွင်းမှ ၎င်းတို့၏ မိသားစုဝင်များလည်း နေ့တိုင်း အထုပ်အပိုးများဖြင့်ပြောင်းရွေ့နေကြကြောင်း ဒေသခံများက မြင်တွေ့ပြီး Hsan Loi Voice ကိုပြောပြသည်။
“ လားရှိုးကို ဒီလ(၁၀) ရက်နေ့နောက်ဆုံးထားပြီး ရွှေ့ပြောင်းပေးဖို့ သတင်းထွက်ပေါ်လာရာကနေ တစ်နေ့ထက်တစ်နေ့ ထွက်ပြေးနေကြတဲ့လူတွေ ပိုများလာတယ်။ စားသောက်ဆိုင်တွေနဲ့ ဈေးဆိုင်နည်းနည်းပဲဖွင့်တော့တယ်။ မြို့ထဲက စစ်တပ်ထဲကနေ အထုပ်အပိုးတွေတင်ပြီးလည်း ပြောင်းနေကြတာတွေ့တော့ လူတွေကပိုကြောက်ကုန်ကြတယ်။ ကျနော်တို့ကတော့ ပြောင်းစရာနေရာလည်းမရှိဘူး ဘယ်မှသွားစရာမရှိတဲ့အတွက်လားရှိုးမှာပဲ ဆက်နေနေပါသေးတယ်။” ဟု ဒေသခံတစ်ဦးက ပြောပြသည်။
လားရှိုးမြို့တွင် စစ်ကောင်စီတပ်ဘက်က ညတိုင်း လက်နက်ကြီးဖြင့် ပစ်ခတ်သည့်အသံများလည်း ထွက်ပေါ်လျက်ရှိကြောင်း သတင်းရရှိသည်။