လက်ရှိအခြေအနေနဲ့ လိုက်လျောညီထွေမှု မရှိတာကြောင့် မြန်မာနိုင်ငံကူးလက်မှတ်ဆိုင်ရာ ဥပဒေ အသစ် ရေးဆွဲပြဋ္ဌာန်းမည်

လက်ရှိ မြန်မာနိုင်ငံမှာ အသုံးပြုနေတဲ့ မြန်မာနိုင်ငံကူးလက်မှတ် အက်ဥပဒေဟာ လက်ရှိအခြေအနေနဲ့ လိုက်လျောညီထွေမှု မရှိတာကြောင့် မြန်မာနိုင်ငံကူးလက်မှတ်ဆိုင်ရာ ဥပဒေအသစ် ရေးဆွဲပြဋ္ဌာန်းမယ်လို့ စစ်ကော်မရှင်ရဲ့ ဥပဒေရေးရာဝန်ကြီးဌာနက ပြောလာပါတယ်။

ဖေဖော်ဝါရီလ ၁၁ ရက်က နေပြည်တော်မှာ ကျင်းပတဲ့ မြန်မာနိုင်ငံကူးလက်မှတ်ဆိုင်ရာ ဥပဒေ(မူကြမ်း) နဲ့ စပ်လျဥ်းတဲ့ အပြီးသတ်ညှိနှိုင်းအစည်းအဝေးမှာ ဥပဒေရေးရာဝန်ကြီးနှင့် ပြည်ထောင်စုရှေ့နေချူပ် ဖြစ်တဲ့ ဒေါက်တာသီတာဦး က ပြောပါတယ်။

မြန်မာနိုင်ငံကူးလက်မှတ်ကို အတုအပပြုလုပ်တာ၊ အခြားသူများရဲ့ နိုင်ငံကူးလက်မှတ်ကို ကိုင်ဆောင် အသုံးပြုတာ၊ မိမိနိုင်ငံကူးလက်မှတ်ကဲ့သို့ ပြင်ဆင်ပြောင်းလဲ အသုံးပြုတာနဲ့ အခြားသူအား အသုံးပြုစေ တာ စတဲ့ လိမ်လည်လုပ်ဆောင်မှုတွေကို အရေးယူဆောင်ရွက်ရာမှာ အခက်အခဲတွေ၊ လိုအပ်ချက်တွေ ဖြေရှင်းဆောင်ရွက်နိုင်ဖို့ ဥပဒေအသစ် ရေးဆွဲရခြင်းဖြစ်တယ်လို့ ပြည်ထဲရေး ဒုဝန်ကြီး က ရှင်းလင်း ပြောကြားခဲ့ပါတယ်။

လက်ရှိအသုံးပြုနေတဲ့ မြန်မာနိုင်ငံကူးလက်မှတ် အက်ဥပဒေဟာ ၁၉၂၀ ပြည့်နှစ် အိန္ဒိယအက်ဥပဒေ အမှတ် ၃၄ နဲ့ ပြဋ္ဌာန်းထားတာဖြစ်ပြီး လက်ရှိအခြေအနေနဲ့ လိုက်လျောညီထွေမှု မရှိတာကြောင့် ဥပဒေအသစ် ပြဋ္ဌာန်းသင့်တယ်လို့ ပြည်ထောင်စုရှေ့နေချုပ်က ဆွေးနွေးပြောကြားသွားခဲ့ပါတယ်။

မြန်မာနိုင်ငံကူးလက်မှတ်ဆိုင်ရာ ဥပဒေပြဋ္ဌာန်းနိုင်ဖို့ ဥပဒေ(မူကြမ်း)မှာပါတဲ့ ပုဒ်မအလိုက် အပြီးသတ် ညှိနှိုင်းဆွေးနွေးသွားခဲ့ကြတယ်လို့ သိရပါတယ်။