ရွေးကောက်ပွဲအလွန်အခင်းအကျင်းမှာ သမ္မတ လုပ်မှာလား ဆိုတဲ့ မီဒီယာတွေရဲ့ မေးမြန်းချက်အပေါ် စစ်ခေါင်းဆောင် မင်းအောင်လှိုင် က လွှတ်တော်ခေါ်တဲ့ခါကျမှ ပြောဖို့သင့်မယ်လို့ ဖြေကြား သွားပါတယ်။
ယနေ့ နံနက်ပိုင်းက နေပြည်တော်ကောင်စီနယ်မြေ၊ ဇေယျာသီရိမြို့နယ်၊ အနော်ရထာရပ်ကွက်ရှိ မဲရုံ အမှတ်(၁) မှာ စစ်ခေါင်းဆောင် က ဆန္ဒမဲပေးပြီး ထွက်လာချိန်မှာ မီဒီယာရဲ့ မေးမြန်းမှုကို ယခုဖြေကြား သွားပါတယ်။
“ကျွန်တော်က တပ်မတော်ကာကွယ်ရေးဦးစီးချုပ်၊ နိုင်ငံဝန်ထမ်း၊ ကျွန်တော်ဘာမှ သွားပြီးတော့ လုပ် ချင်ပါတယ်၊ ပြုချင်ပါတယ်၊ သွားပြောလို့မရဘူး၊ နိုင်ငံရေးပါတီခေါင်းဆောင် မဟုတ်ဘူး။ ပြီးတော့ လွှတ်တော်ခေါ်တဲ့အခါကျမှ လွှတ်တော်ကနေပြီးတော့ သမ္မတရွေးချယ်ရေးနဲ့ ပတ်သက်တဲ့ Process လေးရှိပါတယ်။ အဲဒီကျမှသာ ကျွန်တော်တို့ ပြောဖို့သင့်မယ်လို့ ယူဆပါတယ်” လို့ ပြောဆိုသွားပါတယ်။
ဒါ့အပြင် “ရွေးကောက်ပွဲမှာ ဆန္ဒမဲ ပေးသင့်တယ်၊ မကြိုက်တဲ့လူကို မပေးနဲ့၊ ကြိုက်တဲ့သူကိုပေး ရတယ်၊ ဆန္ဒမဲ မပေးဘူးဆိုရင်တော့ ဒီမိုကရေစီစနစ်ကို အပြည့်အဝ နားမလည်ဘူးလို့ ယူဆလို့ရတယ်” လို့ စစ်ခေါင်းဆောင် က ပြောပါတယ်။