ဒီကနေ့ ကျင်းပတဲ့ ရွေးကောက်ပွဲအပိုင်း ၃ မှာ မန္တလေးတိုင်းရှိ ချမ်းမြသာစည်မြို့နယ်က မဲရုံတွေမှာ စစ်ခေါင်းဆောင် မင်းအောင်လှိုင် က လိုက်လံကြည့်ရှု့ပြီး ရွေကောက်ပွဲမှာ ထောက်ခံသူရှိလို့ ပြည်သူ တွေမဲလာပေးကြတာဖြစ်ပြီး နိုင်ငံခြားက အသိအမှတ်ပြုတာ မပြုတာ နားမလည်ဘူးလို့ မီဒီယာတွေ ရဲ့ မေးမြန်းမှုကို ပြန်လည်ဖြေကြားခဲ့တာဖြစ်ပါတယ်။
“မြန်မာပြည်ထဲမှာနေတဲ့ ပြည်သူက မဲပေးတာလေ၊ အပြင်ကလူတွေ မဲပေးတာမဟုတ်ဘူး၊ သူတို့(ပြည်သူ)တွေ ဘယ်သူ့ကိုထောက်ခံထောက်ခံ ကြိုက်တာထောက်ခံလို့ရတယ်၊ လာပေးတဲ့ သူတွေက ထောက်ခံချင်တဲ့လူရှိလို့ မဲလာပေးကြတာ၊ မဲလာပေးခြင်းမှာ ၂ ပိုင်းရှိပြီး ထောက်ခံချင်တဲ့လူ မရှိလို့ မဲလာမပေးကြသူက တစ်ပိုင်းနဲ့ လုံခြုံမှုအရ မဲလာမပေးကြတာက တစ်ပိုင်းရှိတယ်” လို့ဆိုပါတယ်။
ဒါ့အပြင် နိုင်ငံခြားက အသိအမှတ်ပြုတာ မပြုတာ နားမလည်ဘူး၊ ပြည်သူက မဲပေးတာ ကျွန်တော်အသိ အမှတ်ပြုတယ်လို့ စစ်ခေါင်းဆောင်က ပြောပါတယ်။
နောက်တက်လာမယ့် အစိုးရအဖွဲ့ထဲမှာ ပါဝင်ဖို့ အခြေအနေနဲ့ ပတ်သက်ပြီး မီဒီယာတွေရဲ့ မေးမြန်းမှုကို စစ်ခေါင်းဆောင် က ဆက်လက်ပါဝင်ဖို့ ငြင်းဆိုထားတာမရှိဘဲ လွှတ်တော်က ရွေးချယ်တဲ့ နည်းလမ်းနဲ့ ပဲ ဆက်သွယ်မယ်လို့ ဆိုပါတယ်။
တက်လာမယ့် အစိုးရသစ်အနေနဲ့ ပြည်သူလူထုရဲ့ အကျိုးစီးပွားအတွက် တိုင်းပြည်တိုးတက် ကောင်းမွန်ပြီး အေးချမ်းအောင် ဆောင်ရွက်ပေးဖို့နဲ့ ကမ္ဘာနဲ့ ရင်ဘောင်တန်းနိုင်အောင် လုပ်ဖို့ တာဝန်ရှိ သလို ပြည်သူတွေကလည်း ပူးပေါင်းပါဝင်ဖို့ အရေးကြီးတယ်လို့ စစ်ခေါင်ဆောင် ကပြောပါတယ်။
လက်ရှိ စစ်ကော်မရှင်ရဲ့ ရွေးကောက်ပွဲ နောက်ဆုံးပိုင်းကို နိုင်ငံတဝှမ်းက မြို့နယ် ၆၁ မြို့နယ် မှာ ကျင်းပနေတာပဲဖြစ်ပါတယ်။