သျှမ်းတောင်၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့နယ်၊ လယ်ကိုင်းရွာမှ ဒေသခံအရပ်သား ၄ ဦး ကို အမည်မသိအရပ်ဝတ်လက်နက်ကိုင်အုပ်စုက တစ်ပါတ်ကျော်ကြာသည့်အထိဖမ်းဆီးခေါ်ဆောင်သွား ပြီးယနေ့အထိ ပြန်လည်လွတ်မြောက် လာခြင်းမရှိသေးကြောင်း ဒေသခံများထံမှ သိရသည်။
ဖြစ်စဉ်မှာ ဇန်နဝါရီလ ၂၇ ရက်နေ့၊ ည ၉ နာရီခွဲအချိန်ခန့်တွင် လယ်ကိုင်းရွာအတွင်းသို့ အရပ်ဝတ်လက်နက်ကိုင် လူတစ်စု ရောက်ရှိလာကာ ဒေသခံ ၄ ဦးကို ဖမ်းဆီးခေါ်ဆောင်သွားပြီးနောက် လက်ရှိအချိန်အထိ မိသားစုနှင့် အဆက်အသွယ်မရရှိသေးဟု ဒေသခံတစ်ဦးကပြောသည်။
” ဒီဖက်မှာတော့ လက်နက် ကိုင်အဖွဲ့ဆိုလို့ စစ်တပ်နဲ့ pdf တွေရှိတယ် ၊ သူတို့ကို ဘာကြောင့်ဖမ်းတာလဲမသိဘူး ဖမ်းသွားပြီးတော့လည်း အခုထိဆက်သွယ်လာတာမရှိတော့ အသက်အန္တရာယ်စိုးရိမ်နေကြတယ်” ဟု ဒေသခံက ဆိုသည်။
ဖမ်းဆီးခေါ်ဆောင်ခံရသူများမှာ အသက် ၅၄ နှစ်အရွယ် ဦးစံရွှေမြင့်၊ အသက် ၄၃ နှစ်အရွယ် ဦးကျော်မိုးသူ၊ အသက် ၄၄ နှစ်အရွယ် မဝေဆုလှိုင်နှင့် အသက် ၆၃ နှစ်အရွယ် အမျိုးသားတစ်ဦး (အမည်စုံစမ်းဆဲ) တို့ ဖြစ်ပြီး ၄င်းတို့ ၄ ဦးကို မည်သည့်အဖွဲ့အစည်းက မည်သည့်အ ကြောင်းရင်းကြောင့် လာရောက်ဖမ်းဆီးသွားသည်ကို အတိ အကျ မသိရှိရသေးဘဲ ဖမ်းဆီးခံရပြီး တစ်ပတ်ကြာမြင့်သည်အထိ သတင်းအစအန ပျောက်ဆုံးနေခြင်း ဖြစ်ကြောင်းသိရသည်။
ပြီးခဲ့သည့် ဇန်နဝါရီ ၂၁ ရက်ကလည်း ရွာငံမြို့နယ် မြေနီကုန်းကျေးရွာအုပ်ချုပ်ရေးမှူးတစ်ဦး ၄င်း၏ နေအိမ်တွင်လုပ်ကြံသတ်ဖြတ်ခံရပြီး အဆိုပါအမှုနှင့်ပတ်သက်၍ မည်သည့်အဖွဲ့အစည်းကလုပ်ဆောင်ကြောင်း အများပြည်သူသိရှိခြင်းမရှိသလို အ တည်ပြုနိုင်ခြင်းမရှိသေးဟု သိရသည်။
ရွာငံမြို့နယ်တွင် စစ်ကောင်စီနှင့် ပျူစောထီးပူး ပေါင်းတပ် ၊ ဓနုအမျိုးသားလွတ်မြောက်ရေးတပ်ဦး DPLA/DPLF နှင့် ဓနုပြည်နယ်အမျိုးသားကာကွယ် ရေးတပ် DSNDA) စသည့် လက်နက်ကိုင် တပ်ဖွဲ့များ လှုပ်ရှား လျှက်ရှိသည်။