ယနေ့ ဇန်နဝါရီလ ၁၁ ရက်နေ့မှာ စတင်ကျင်းပနေတဲ့ ရွေးကောက်ပွဲ အပိုင်း ၂ မှာ ရန်ကုန်တိုင်းအတွင်းရှိ မဲရုံတွေကို စစ်ခေါင်းဆောင် မင်းအောင်လှိုင်က လိုက်လံကြည့်ရှုနေတယ်လို့ စစ်တပ်ထောက်ခံ တယ်လီဂရမ်ချန်နယ်က ဖော်ပြထားပါတယ်။
ရန်ကုန်တိုင်းအတွင်းရှိ လှိုင်မြို့နယ်ရှိ အမှတ်(၁၆)ရပ်ကွက်၊ မဲရုံအမှတ်(၃) နဲ့ (၄) အပြင် အင်းစိန်မြို့နယ် မြို့သစ်(က+ခ)ရပ်ကွက်ထဲက မဲရုံအမှတ်(၁)နဲ့ (၄) တွေမှာ စစ်ခေါင်းဆောင်က လိုက်လံကြည့်ရှု့နေတာပါ။
အခု ကျင်းပနေတဲ့ ရွေးကောက်ပွဲ အပိုင်း ၂ မှာ ရန်ကုန်အတွင်းက ဗဟန်း၊ ပန်းဘဲတန်း၊ လသာ၊ ကော့မှူး၊ ကွမ်းခြံကုန်း၊ ဒဂုံမြို့သစ်(မြောက်ပိုင်း)၊ ဒေါပုံ၊ ပုဇွန်တောင်၊ လှိုင်၊ ရွှေပြည်သာ၊ ထန်းတပင်၊ လှည်းကူး၊ တောင်ဥက္ကလာပ၊ ကိုကိုးကျွန်း၊ ကြည့်မြင်တိုင်နဲ့ အင်းစိန်မြို့နယ် စတဲ့ မြို့နယ် ၁၆ မြို့နယ် ပါဝင်ပြီး မဲရုံ ၁၁၇၁ ရုံ ဖွင့်လှစ်ကာ မဲပေးသူ ၁၅ သိန်းကျော်ရှိတယ်လို့ ရန်ကုန်တိုင်း ရွေးကောက်ပွဲကော်မရှင်အဖွဲ့ခွဲ ကနေ သိရပါတယ်။