ယမန်နေ့က စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် အား ရန်ကုန်တက္ကသိုလ်က ဂုဏ်ထူးဆောင် ပြည်သူ့ရေးရာစီမံခန့်ခွဲမှု ပါရဂူဘွဲ့ပေးအပ်ခြင်းအပေါ် ရန်ကုန်တက္ကသိုလ် ကျောင်းသား၊ ဝန်ထမ်း၊ ဆရာအင်အားစုများက ပြင်းထန်စွာရှုတ်ချတယ်လို့ ပူးတွဲထုတ်ပြန်ထားပါတယ်။
စစ်ခေါင်းဆောင်ကို စစ်အုပ်စု ခန့်ထားတဲ့ လက်အောက်ခံ ရန်ကုန်တက္ကသိုလ်အုပ်ချုပ်ရေးအဖွဲ့က အထူး ဘွဲ့နှင်းသဘင် ကျင်းပပြီး ဂုဏ်ထူးဆောင်ပေးအပ်တာဟာ စစ်အုပ်စုကို မျက်နှာချိုသွေးကာ ဘွဲ့တံဆိပ်ကို တံစိုးလက်ဆောင်အဖြစ် ရောင်းစားခြင်းအား ရှုတ်ချတယ်လို့ ဆိုပါတယ်။
စာသင်ကျောင်းတွေကို ဗုံးကြဲနေတဲ့ စစ်ရာဇဝတ် တရားခံ စစ်ခေါင်းဆောင်ရဲ့ ကိုယ်မှာ ကျောင်းသူ/သား တို့ရဲ့ သွေးများစွန်းပေပြီး သွေးစွန်းတဲ့ လက်နဲ့ကိုင်တွယ်ခဲ့တဲ့ ဘွဲ့လက်မှတ်သည်လည်း ဂုဏ်သိက္ခာကင်းမဲ့ခဲ့ရကာ ဘွဲ့နှင်း သဘင်ခန်းမမှာလည်း သွေးညှီနံ့များ လှိုင်နေပြီလို့ ထုတ်ပြန်ဖော်ပြထားပါတယ်။
စစ်အာဏာရှင်စနစ် တည်ရှိနေသရွေ့ စစ်ကျွန်ပညာရေးစနစ်သည်လည်း သက်ဆိုးရှည်နေမည်ဖြစ်ပြီး စစ်အာဏာရှင်စနစ်အား အမြစ်ပြတ်ချေမှုန်းမှသာလျှင် ကျွန်ုပ်တို့ အားလုံးနဲ့ ထိုက်တန်တဲ့ ဒီမိုကရေစီ ပညာရေးစနစ်ကို တည်ဆောက်နိုင်မှာဖြစ်တယ်လို့ ရန်ကုန်တက္ကသိုလ် ကြားကာလတက္ကသိုလ်ကောင်စီ၊ ရန်ကုန်တက္ကသိုလ်ဆရာ၊ဆရာမများအသင်း၊ ရန်ကုန်တက္ကသိုလ်ကျောင်းသားများသမဂ္ဂ (ဗကသများ အဖွဲ့ချုပ်) က ထုတ်ပြန်ထားပါတယ်။
စစ်ခေါင်းဆောင်အား ဂုဏ်ထူးဆောင်ပါရဂူဘွဲ့ ပေးအပ်ချီးမြင့်ရခြင်းမှာ “မိမိတို့နိုင်ငံ၏ နိုင်ငံရေး အပြောင်းအလဲဖြစ်စဉ်တွင် ကြုံတွေ့ခဲ့ရသည့် စိန်ခေါ်မှုအခက်အခဲများကို ဦးဆောင်ဦးရွက်ပြုပြီး စနစ်တကျ စီမံခန့်ခွဲဖြေရှင်းနိုင်ခဲ့သည့် စွမ်းဆောင်ချက်များကြောင့်ဖြစ်တယ်” လို့ ပညာရေးဝန်ကြီး ဒေါက်တာချောချောစိန် က ပြောပါတယ်။