မြန်မာနိုင်ငံသို့ ပို့ဆောင်မည့် မူးယစ်ဆေးဝါးချက်လုပ်ရာတွင် အသုံးပြုသည့် ဓာတုပစ္စည်းကုန်ကြမ်းတန်ချိန်(၈၀၀)ကို အောက်တိုဘာလ (၁၇)ရက် မနက်ပိုင်းက ထိုင်း-မြန်မာနယ်စပ်၊ မဲဆောက်မြို့နယ်ရှိ ဂိုဒေါင်နှစ်လုံးအတွင်းမှာ ထိုင်းရဲတပ်ဖွဲ့များက သိမ်းဆည်းရမိကြောင်း ထိုင်းမီဒီယာမှာဖော်ပြထားသည်။
သတင်းရရှိမှုအရ ထိုင်းအထူးစုံစမ်းစစ်ဆေးရေးအဖွဲ့ များပါဝင်သောပူးပေါင်းအဖွဲ့သည် မဲဆောက်မြို့၊ မဲ့ကုစမ်ထောက်ကျေးရွာရှိ ဂိုဒေါင်အတွင်း ဝင်ရောက်စစ်ဆေးရာ မူးယစ်ဆေးဝါး ထုတ်လုပ်ရာတွင်အသုံးပြုသည့် ဓာတုပစ္စည်း ကုန်ကြမ်းများ ထည့်ထားသည့် ပီပါ (၄၄၁၈) လုံး၊ မဲဆောက်ရပ်ကွက်ထဲရှိ ဂိုဒေါင်အတွင်းမှ ဓာတုပစ္စည်း များထည့်ထားသည့် ပီပါ(၃၆၀)လုံး စုစုပေါင်း တန်ချိန်(၈၀၀)တို့အား သိမ်းဆည်းရမိခဲ့ပြီး ဂိုဒေါင်ပိုင်ရှင်ထိုင်းနိုင်ငံသား(၂)ဦးကို ရဲတပ်ဖွဲ့များက ဖမ်းဆီးစစ်ဆေးမှုပြုလုပ်ကြောင်း သိရပါသည်။
အလားတူ ယမန်နေ့ မနက်အစောပိုင်းက ထိုင်း-မြန်မာ နယ်စပ်၊ မယ်ဆိုင်မြို့နယ်၊ ဆီပါဒဲန်းကျေးရွာအနီး လုံခြုံရေးယူထားတဲ့ ထိုင်းရဲတပ်ဖွဲ့နှင့် မူးယစ်ဆေးဝါးသယ်ဆောင်လာသော အဖွဲ့ပစ်ခတ်မှုဖြစ်ပွားပြီး ဘိန်းဖြူ တောင့် (၃၄၀)တောင့်၊ အလေးချိန် (၁၁၉)ကီလိုဂရမ် သိမ်းဆည်းရမိကြောင်း သိရှိရပါသည်။
