ဧရာဝတီမြစ်ရေမြင့်တက်လာမှုကြောင့် ကချင်ပြည်နယ် မြစ်ကြီးနားမြို့က ပိတ်မိနေတဲ့ ရေဘေးသင့် ပြည်သူတွေကို ကယ်ဆယ်ဖို့ ကယ်ဆယ်ရေးစက်လှေတွေ အများအပြားလိုအပ်နေပြီး စက်လှေတွေလည်း ဓာတ်ဆီမဖြည့်နိုင်တဲ့အတွက် အခက်အခဲတွေရှိနေတယ်လို့ ကယ်ဆယ်ရေးသမား တွေဆီက သိရပါတယ်။
စက်သုံးဆီဈေးနှုန်းတွေ မြင့်တက်နေတဲ့အပြင် ဆီပန့်ဆိုင်အချို့တွေမှာလည်း ရေဝင်ပြီး ရောင်းချခြင်းမရှိဘဲ ပိတ်ထားရတာကြောင့် လိုသလိုဝယ်ယူလို့ မရနိုင်ကြောင်း သိရသည်။
ဒါ့အပြင် မြစ်ရေကြီးလာတာနဲ့အမျှ ရေစီးနှုန်းတွေလည်း ကြမ်းတဲ့အတွက် စက်လှေတွေထွက်ဖို့ အခက်အခဲရှိနေကြပြီး ပိတ်မိနေတဲ့ ရေဘေးသင့်ပြည်သူထောင်ချီရှိကြောင်း သိရသည်။
ဇူလိုင်(၁)ရက်နေ့မှ ဇူလိုင်(၄)ရက်နေ့အတွင်း ကချင်ပြည်နယ်မှာ ထူးကဲမိုးတွေ ရွာသွန်းနိုင်ပြီး မြစ်ကြီးနား ၊ ဝိုင်းမော် မြစ်ရေများစွာ တိုးလာနိုင်ကာ ဧရာဝတီမြစ်ရိုးတလျှောက် မြစ်ရေများ တိုးလာနိုင်ကြောင်း မိုးလေဝသနဲ့ဇလ ဗေဒပညာရှင် က ခန့်မှန်းထားပါသည်။
ဇွန်လ ၃၀ ရက်နေ့ ညပိုင်းအချိန်ကနေ ဧရာဝတီမြစ်ရေ စတက်လာပြီး စိုးရိမ်ရေမှတ်ကို ကျော်လွန်လာတဲ့အတွက် မြစ်ကြီးနားမြို့ ရေဝင်ရောက်လာကြောင်း သိရှိရပါသည်။
