ဇွန်လ ၆ ရက်နေ့ ညနေ ၃ နာရီကျော်ခန့်အချိန်မှာ ရှမ်းပြည်နယ်တောင်ပိုင်း မောက်မယ်မြို့နယ်ရှိ မြို့ဦးဂိတ်မှာ တာဝန်ကျ ပြည်သူ့စစ်တစ်ဦး ကိုယ့်ကို အဆုံးစီရင်မှု ဖြစ်ပွားကြောင်း သိရသည်။
မောက်မယ်မြို့နယ် မြို့ဦးဂိတ်အနီး မြို့အဝင်ရှိ နမ့်ပိန်တံတားအောက်မှာ ဒေသခံတစ်ဦးက ရေချိုးရန် သွားရောက်ရာ သွေးသံတရဲရဲဖြင့် လူသေအလောင်း တွေ့ကာ သက်ဆိုင်ရာ ရပ်ကွက်အုပ်ချုပ်ရေးမှူးနှင့်တာဝန်ရှိသူတို့ကို သွားရောက်သတင်းပေးပြီး လာရောက်စစ်ဆေးရာ မြို့ဦးဂိတ်မှာတာဝန်ကျ ပြည်သူ့စစ်ဖြစ်ကြောင်း သိရသည်။
အဆိုပါ သေဆုံးသူ ပြည်သူ့စစ်သည် ရှမ်းပြည်နယ်တောင်ပိုင်းလင်းခေးမြို့နယ် ဝမ်ဟတ်ကျေးရွာအုပ်စု ဟိုကွန်ကျေးရွာမှ ဖြစ်ကြောင်းသိရသည်။
“ မနက်ဖန်ဆို သူ့တာဝန်ပြီးတော့ အိမ်ပြန်ရတော့မှာကို ကိုယ့်ကိုယ်ကိုသတ်သေသွားတယ်၊ ဘာတွေစိတ်ညစ်စရာရှိလည်းတော့မသိဘူး၊ သူ့မှာ မိန်းမနဲ့ ကလေးငယ် ရှိတယ် ” လို့ ဒေသခံအမျိုးသားတစ်ဦးက ပြောသည်။
လုံခြုံရေးအင်အား မလုံလောက်မှုကြောင့် မောက်မယ်မြို့နယ်ရှိ မြို့အဝင်အထွက်ဂိတ်များကို တခြားမြို့နယ်မှ ပြည်သူ့စစ်များက (၁၅)ရက်တခါ အလှည့်ကျ လာရောက် တာဝန်ထမ်းဆောင်ရကြောင်း သိရသည်။
Photo – CJ