သျှမ်းပြည်မြောက်ပိုင်း မုံးစီးမြို့နယ် ရေပူစမ်းအပန်းဖြေနေရာတွင် ယမန်နေ့ အောက်တိုဘာလ (၁၀) ရက် နံနက်အစောပိုင်းက စစ်ကောင်စီမှလေကြောင်းဖြင့် လာရောက်ဗုံးကြဲမှုကြောင့် အရပ်သား(၁)ဦး ထိခိုက်ဒဏ်ရာရရှိကြောင်း သိရသည်။
စစ်ရေးပစ်မှတ်မဟုတ်သည့် ၎င်းရေပူစမ်းနေရာသည် မုံးစီးမြို့နယ်နှင့် တာမိုးညဲမြို့နယ်မှ ပြည်သူများ၏ အပန်းဖြေစခန်းနေရာတစ်ခုသာဖြစ်ပြီး စစ်ကောင်စီမှ လေကြောင်းဖြင့် ဗုံး(၄)လုံး ကြဲချတိုက်ခိုက်ခဲ့ပြီး အဆောက်အဦးတစ်ချို့လည်း ပျက်စီးသွားကြောင်း PSLF/TNLA က ထုတ်ပြန်ထားသည်။
ပြီးခဲ့သည့် သြဂုတ်လ(၅)ရက်နေ့က စစ်ကောင်စီမှ ကွတ်ခိုင်မြို့အား တစ်နေ့အတွင်း (၄)ကြိမ် လေကြောင်းသုံးတိုက်ခိုက်မှုကြောင့် ကွတ်ခိုင်မြို့ခံ ပြည်သူ (၆)ဦး သေဆုံးခဲ့ရပြီး (၁၀)ဦး ထိခိုက်ဒဏ်ရာရရှိကာ ကွတ်ခိုင်မြို့မဈေး မီးလောင်သွားခဲ့ပြီး ဆိုင်ခန်းပေါင်း(၄၀၁)ခန်း မီးလောင်ပျက်စီးသွားခဲ့ ကြောင်းသိရှိရပါသည်။
