ယမန်နေ့ ညသန်းခေါင်အချိန် ၁၂ နာရီခွဲ ဝန်းကျင်ခန့်က မိုးရွာသွန်းမှုကြောင့် မန္တလေးတိုင်း၊ မဟာအောင်မြေမြို့နယ် ငလျင်ကယ်ဆယ်ရေးစခန်းရှိ ယာယီမိုးကာတဲပေါ် ကုက္ကိုလ်ပင်လဲကျလို့ သားအဖနှစ်ဦး သေဆုံးသွားတယ်လို့ မြန်မာနိုင်ငံ မီးသတ်တပ်ဖွဲ့က ထုတ်ပြန်ထားပါတယ်။
မဟာအောင်မြေမြို့နယ်၊ စိန်ပန်းရပ်ကွက်၊ ၄၁ လမ်းနှင့် ၈၉ လမ်းထောင့်ရှိ အဘယာရာမရွှေဂူ ကျောင်းတိုက်အတွင်းရှိ ငလျင်ဘေးသင့်ကယ်ဆယ်ရေးစခန်းမှာ လုံးပတ် ၅ ပေခန့်ရှိတဲ့ ကုက္ကိုလ်ပင်ဟာ အမြစ်ခြေမှ လှန်ပြီး လဲကျရာမှ ယာယီလူနေမိုးကာတဲပေါ် ပိမိတယ်လို့ သိရပါတယ်။
သစ်ပင်လှဲကျမှုကြောင့် သေဆုံးသူ အမျိုးသား ၁ဦး၊ အမျိုးသမီး ၁ ဦးတို့ကို မိုဃ်းကောင်းရသ လူမှုကူညီ ရေးအသင်းမှ လူနာတင်ယာဥ်နဲ့ မန္တလေးပြည်သူ့ဆေးရုံကြီးသို့ ပို့ဆောင်ပေးခဲ့တယ်လို့ ဆိုပါတယ်။
ယမန်နေ့ မေလ ၁၇ ရက် ည ၁၀ နာရီ ၂၅ မိနစ်အချိန်တွင် မန္တလေးတိုင်း ကျောက်ဆည်မြို့ အနောက်− အနောက်တောင်ဘက် ၃၅ ကီလိုမီတာအကွာ၊ မြေအောက်အနက် ၁၀ ကီလိုမီတာကို ဗဟိုပြုပြီး ရစ်ခ် တာစကေး ၅ ဒသမ ၇ အဆင့်ရှိ မြေငလျင်လှုပ်ခတ်သွားကြောင်း NUG က ထုတ်ပြန်ထားပါတယ်။
မန္တလေးတိုင်းထဲက မြို့နယ်များအပါအဝင် သျှမ်းပြည်နယ်တောင်ပိုင်းရှိ မြို့နယ်အချို့မှာလည်း ငလျင် သိသိသာသာလှုတ်ခပ်သွားတယ်လို့ သိရပါတယ်။
