ဩဂုတ်လ (၂၂) ရက်နေ့မှ (၂၅) ရက်နေ့အထိ သျှမ်းပြည်နယ်နေရာအနှံ့အပြား၌ မိုးသည်းထန်စွာ ရွာသွန်းခဲ့သည်။ မိုးအဆက်မပြတ်ရွာသွန်းမှုကြောင့် သျှမ်းပြည်နယ်မြောက်ပိုင်းနှင့်သျှမ်းပြည်နယ်တောင်ပိုင်းကို ဆက်သွယ်ထားသော ကားလမ်းမကြီးအချို့ ရေကြီးရေလျှံမှုဖြစ်ကာ သွားလာရန် ခက်ခဲနေသည်။
တောင်ကြီး-ရပ်စောက်-အင်တော-ကျောက်ဂူ လမ်းပိုင်းအတွင်း ကားလမ်းမကြီးပေါ် ရေကျော်မှုဖြစ်ကာ ဩဂုတ်လ(၂၅)ရက်နေ့ ယမန်နေ့က ကားများပိတ်မိခဲ့သည်ဟုဆိုသည်။
“ မနေ့က အင်တော-ရပ်စောက်လမ်း ဇော်ဂျီနားမှာ ရေအရမ်းတက်ပြီးတော့ ကားတွေ ၃ နာရီလောက်ပိတ်ပြီး ရပ်စောင့်ခဲ့ရတယ်။ မိုး (၅) ရက်လောက် ဆက်တိုက်ရွာထားတော့ ရေအရမ်းတက်ပြီး သွားဖို့လာဖို့ ခက်နေတာပါ။ ရပ်စောက်-တောင်ကြီးကြားက လူရိုးတောင်ရွာနားမှာလည်း မနေ့က နေ့လည်ပိုင်းလောက်မှာ လမ်းပေါ်ရေကျော်ပြီး ကားငယ်တွေသွားလို့တောင်မရဘူး။ မိုးဆက်တိုက်ရွာရင် ဒီလမ်းက သွားရတာအဆင်မပြေဘူးဗျ။” ဟု ကျောက်မဲ-တောင်ကြီး ခရီးသည်တင်ယာဉ်မောင်းတစ်ဦးက ဆိုသည်။
ဒါ့အပြင် ကျောက်ဂူ-နမ့်လန်လမ်းသည်လည်း မိုးအဆက်မပြတ်ရွာသွန်းမှုကြောင့် ပွတ်ထနေပြီး အိမ်စီးကားများ သွားလာရန်ခက်ခဲနေသည်ဟုသိရသည်။ မိုးရာသီအတွင်း အဆိုပါလမ်းများတွင် ခရီးသွားမည်ဆိုပါက ရာသီဥတုအခြေအနေနှင့် လမ်းခရီးအခြေအနေအား ကြိုတင်စုံစမ်းပြီးမှ သွားလာရန် လိုအပ်သည်။
