မိုင်းရယ်မြို့နယ် မိုင်းဟဒေသအတွင်း တရုတ်နှင့် ဗီယက်နမ်နိုင်ငံသားအပါအဝင် ကျားဖြန့်လုပ်ငန်း ဆောင်ရွက်နေသူ (၈၁)ဦးနဲ့အတူ ဆက်စပ်ပစ္စည်းများ ဖော်ထုတ်ဖမ်းဆီးရမိပြီး သက်ဆိုင်ရာနိုင်ငံများသို့ ပြန်လည်လွှဲပြောင်းပေးအပ်သွားမည်

သျှမ်းပြည်နယ်မြောက်ပိုင်း၊ မိုင်းရယ်မြို့နယ်ရှိ မိုင်းဟဒေသအတွင်းတွင် ဖေဖော်ဝါရီလ (၅)ရက်နေ့မှ (၇)ရက်နေ့အထိ တရုတ်နှင့် ဗီယက်နမ်နိုင်ငံသား အပါအဝင် တရားမဝင် အွန်လိုင်းငွေကြေးလိမ်လည်မှု (ကျားဖြန့်)လုပ်ငန်း ဆောင်ရွက်နေသူ (၈၁)ဦး နဲ့ ဆက်စပ်ပစ္စည်းများ ဖော်ထုတ်ဖမ်းဆီးရမိတယ်လို့ စစ်ကောင်စီရဲ့ သတင်းထုတ်ပြန်ရေးအဖွဲ့က ယမန်နေ့က ထုတ်ပြန်ထား ပါတယ်။

မိုင်းရယ်မြို့နယ် မိုင်းဟဒေသမှာ (၃)ရက်တာအတွင်း တရုတ်နိုင်ငံသား အမျိုးသား ၂၇ ဦး၊ အမျိုးသမီး ၂ ဦး၊ ဗီယမ်နမ်နိုင်ငံသား အမျိုးသမီး ၁၈ ဦးနဲ့ မြန်မာနိုင်ငံသား အမျိုးသား ၅ ဦး၊ အမျိုးသမီး ၂၉ ဦး၊ စုစုပေါင်း (၈၁) ဦး ဖမ်းဆီးရမိခဲ့ပြီး ကျားဖြန့်လုပ်ငန်းများ ဆောင်ရွက်ရာမှာ အသုံးပြုတဲ့ ဖုန်းမျိုးစုံ ၂၆၀ လုံး၊ ကွန်ပျုတာ ၁၁၈ လုံး၊ Starlink ၇ စုံ၊ Wifi စက် ၂ လုံး၊ ငါးဂိမ်းစက် ၅ လုံးနဲ့ မော်တော်ယာဥ် ၃ စီး ဖမ်းဆီးရမိတယ်လို့ ထုတ်ပြန်ထားပါတယ်။

ဒါ့အပြင် လုံခြုံရေးတပ်ဖွဲ့ဝင်များ ပါဝင်တဲ့ ပူးပေါင်းအဖွဲ့များ ဝင်ရောက်ရှာဖွေစဥ် မိုင်းရယ်မြို့ အရှေ့တောင်ဘက်ဝန်းကျင်မှာ ကျားဖြန့်လုံခြုံရေးအဖွဲ့များနဲ့ အပြန်အလှန် ထိတွေ့တိုက်ပွဲဖြစ်ပွားပြီး ကျားဖြန့်လုံခြုံရေးအဖွဲ့မှ အလောင်း ၂ လောင်းနဲ့အတူ လုံခြုံရေး ၅ ဦးနဲ့ လက်နက်မျိုးစုံ ဖမ်းဆီးရမိတယ် လို့ ဆိုပါတယ်။

ဖမ်းဆီးရမိတဲ့ ပြည်ပနိုင်ငံသားများကို လူသားချင်းစာနာထောက်ထားမှုနဲ့ နိုင်ငံအချင်းချင်း ချစ်ကြည်ရင်းနှီးမှုကို ရှေးရှုပြီး သက်ဆိုင်ရာနိုင်ငံများသို့ ပြန်လည်လွှဲပြောင်းပေးနိုင်ဖို့ ဆောင်ရွက်သွား မှာဖြစ်ပြီး စစ်ကောင်စီအနေနဲ့ နယ်စပ်ဒေသက ကျားဖြန့်လုပ်ငန်းများ တားဆီးကာကွယ် တိုက်ဖျက် နိုင်ရန်အတွက် အိမ်နီးချင်းနိုင်ငံတွေနဲ့ ပူးပေါင်းဆောင်ရွက်သွားမယ်လို့ စစ်ကောင်စီ က ထုတ်ပြန်ထား ပါတယ်။