ရခိုင်ပြည်နယ်၊ ပုဏ္ဏားကျွန်းမြို့နယ်၊ ယိုးငူကျေးရွာ စျေးအတွင်းသို့ ပြီးခဲ့တဲ့ ဖေဖော်ဝါရီလ ၂၄ ရက် မွန်းလွဲပိုင်းအချိန်က စစ်ကော်မရှင်ရဲ့ လေကြောင်းတိုက်ခိုက်မှုကြောင့် အပြစ်မဲ့အရပ်သားပြည်သူ ၁၈ ဦး ထက်မနည်းသေဆုံးပြီး ထိခိုက်ဒဏ်ရာ ရရှိသူ ၁၇ ဦးခန့် ရှိတယ်လို့ ပုဏ္ဏားကျွန်းလူငယ်အစည်းအရုံးရဲ့ အချက်အလက်အရ သိရပါတယ်။
သေဆုံးသူအများစုမှာ အမျိုးသမီးများနဲ့ ကလေးငယ်များဖြစ်ကြပြီး အချို့မှာ အသက် ၆ နှစ်မှ ၁၅ နှစ် ကြား အရွယ်တွေ ဖြစ်ကြတယ်လို့ သိရပါတယ်။
ယခုလေကြောင်းတိုက်ခိုက်မှုနဲ့ ပတ်သက်ပြီး စစ်ကော်မရှင်ဘက်က ယနေ့ချိန်ထိ တစ်စုံတစ်ရာ ထုတ်ပြန်တာ မရှိသေးပါဘူး။
စစ်ကော်မရှင်ရဲ့ လေကြောင်းစစ်ဆင်ရေးဟာ အကြမ်းဖက်သမား လို့ သတ်မှတ်ထားတဲ့ လက်နက်ကိုင် အဖွဲ့များကိုသာ ပစ်မှတ်ထားတိုက်ခိုက်တာလို့ ယခင်က ပြောကြားလေ့ရှိပေမယ့် ယခုလို လူနေထူထပ် တဲ့ဒေသကို ပစ်မှတ်ထားပြီး လေကြောင်းတိုက်ခိုက်မှု ပြုလုပ်တာဟာ နိုင်ငံတကာဥပဒေအရ စစ်ရာဇဝတ်မှုမြောက်တယ်လို့ လူ့အခွင့်အရေးအဖွဲ့များက သတိပေးထားပါတယ်။
ရခိုင်ပြည်နယ်မှာ ၂၀၂၃ ခုနှစ်နှောင်းပိုင်းမှ စတင်ပြီး စစ်ကော်မရှင်နဲ့ အာရက္ခတပ်တော်(AA) တို့အကြား တိုက်ပွဲများ ပိုမိုပြင်းထန်လာခဲ့ပါတယ်။ ရခိုင်လူထုအတွက် ကိုယ်ပိုင်ပြဋ္ဌာန်းခွင့် ပိုမိုရရှိရန် ကြိုးပမ်းနေတဲ့ AA ဟာ စစ်တပ်အာဏာသိမ်းတဲ့ ၂၀၂၁ ခုနှစ် ဖေဖော်ဝါရီလ နောက်ပိုင်းကစပြီး ဖြစ်ပွားလာတဲ့ ပြည်တွင်းစစ်အတွင်းမှာ AA က ရခိုင်ပြည်နယ်တစ်ဝန်းလုံးရှိ နယ်မြေ အမြောက်အများ ကို သိမ်းပိုက်ထားနိုင်ခဲ့ပါတယ်။
တော်လှန်ရေးအင်အားစုများ နယ်မြေအသားစီး ရလာတာနဲ့အမျှ စစ်တပ်ဟာ အတိုက်အခံအင်အားစုများ ထိန်းချုပ်ထားတဲ့ နယ်မြေဒေသတွေကို လေ ကြောင်း အားကိုးပြီး ဗုံးကြဲတိုက်ခိုက်မှုများ ပိုမိုလုပ် ဆောင်လာတာဖြစ်ပါတယ်။
