နှစ်နိုင်ငံခရီးသွားလာရေး၊ ချစ်ကြည်ရေးနဲ့ ပူးပေါင်းဆောင်ရွက်တာတွေ ပိုမိုအားကောင်းလာစေဖို့ ရည်ရွယ်ပြီး ရုရှားနဲ့ မြန်မာ ဗီဇာမလိုဘဲ ခရီးသွားလာခွင့် အခုလကုန်ပိုင်းမှာ စတင်တော့မယ်လို့ သိရပါတယ်။
ရုရှားနဲ့ မြန်မာ နှစ်နိုင်ငံကြား ဗီဇာလိုအပ်ချက် အပြန်အလှန် ဖျက်သိမ်းရေး သဘောတူညီချက်ကို ပြီးခဲ့တဲ့ ၂၀၂၅ ခုနှစ် အောက်တိုဘာလ ၂၈ ရက်နေ့က ဘယ်လာရုစ်နိုင်ငံ၊ မစ်ဇ်မြို့မှာ လက်မှတ်ရေးထိုး ခဲ့တာပါ။
အခုလာမယ့် ဇန်နဝါရီလ ၂၇ ရက်နေ့ကစပြီး အသက်ဝင်မှာဖြစ်ကာ ရုရှားနဲ့ မြန်မာ ဗီဇာမလိုဘဲ ခရီးသွားလာခွင့် ရရှိနိုင်တော့မှာဖြစ်ပါတယ်။
ဒီသဘောတူညီချက်အရ ရုရှားနိုင်ငံသားနဲ့ မြန်မာနိုင်ငံသားတွေဟာ နိုင်ငံဖြတ် သန်းဝင်ရောက်နေထိုင်ဖို့ တစ်ကြိမ်ဝင်ရောက်တိုင်း ရက် ၃၀ အထိ နေထိုင်ခွင့်ရရှိမှာဖြစ်ပေမယ့် အမြဲတမ်းနေထိုင်ခွင့်၊ ပညာသင်ကြားခွင့်နဲ့ အလုပ်လုပ်ကိုင်ခွင့် ရရှိမှာမဟုတ်သလို ပြက္ခဒိန်တစ်နှစ်အတွင်း နေထိုင်ချိန် ရက်ပေါင်း ၉၀ မကျော်လွန်ရဘူးလို့ ရုရှားနိုင်ငံခြားရေးဝန်ကြီးဌာနက ထုတ်ပြန်ထားပါတယ်။