စစ်ကောင်စီတပ်က တအာင်း(ပလောင်)TNLA ထိန်းချုပ်ထားတဲ့ မြို့များကို နေ့ညဆက်တိုက် လေကြောင်းနဲ့ ဗုံးကြဲတိုက်ခိုက်မှုများအတွက် အလှည့်ရှိလာမယ်လို့ TNLA ခေါင်းဆောင် ဗိုလ်ချုပ် တားဘုန်းကျော်က သူ့ရဲ့ လူမှုကွန်ယက်စာမျက်နှာမှာ ယနေ့ ညနေပိုင်းအချိန်က ရေးသားထားပါတယ်။
“ထုံးတို့ထားမယ်၊ မနက်၊ နေ့ခင်း၊ ညနေ၊ ညသန်းခေါင် ဆက်တိုက် လေယာဥ် ဗုံးကြဲနေတာ၊ ကြဲတဲ့သူ၊ ကြဲဖို့ဆော်သြသူ၊ ကြဲခံရတာကို ဝမ်းမြောက်လက်ခုပ်တီးသူ အားလုံးကို ထုံးသေချာတို့ မှတ်ထားမယ်၊ အလှည့်ဆိုတာ ရှိစမြဲပါ” ဆိုပြီး ၎င်းက ရေးသားထားပါတယ်။
ယမန်နေ့ ညပိုင်းနဲ့ ယနေ့မွန်းလွဲပိုင်းအချိန်တွင် စစ်ကောင်စီတပ်က TNLA ထိန်းချုပ်ထားတဲ့ နယ်မြေတွေ ဖြစ်တဲ့ နမ့်ဆန်၊ မိုးကုတ်၊ မန်တုံနဲ့ မိုင်းငေါ့မြို့နယ်တို့မှာ လေကြောင်းတိုက်ခိုက်မှုများ ပြုလုပ်တာကြောင့် ၆ ဦးသေဆုံးပြီး ၈ ဦးထက်မနည်း ဒဏ်ရာရရှိတယ်လို့ သိရပါတယ်။
ယခုအောက်တိုဘာလအတွင်း မန်တုံ၊ ကျောက်မဲ၊ သီပေါ၊ မိုင်းငေါ့၊ မိုင်းလုံ၊ နမ့်ဆန်၊ နမ္မတူ၊ မိုးမိတ်နဲ့ မိုးကုတ်မြို့တို့ကို စစ်ကောင်စီက လေကြောင်းတိုက်ခိုက်မှု စုစုပေါင်း ၂၈ ကြိမ်ပြုလုပ်ပြီး သံဃာ ၂ ပါးနဲ့ ကလေး ၈ ဦးအပါအဝင် ၄၁ ဦး သေဆုံးပြီး ၄၄ ဦး ဒဏ်ရာရရှိကာ နေအိမ်၊ စာသင်ကျောင်း၊ ဘုန်းကြီးကျောင်းအပါအဝင် အဆောက်အဦး ၁၅၅ လုံး ထိခိုက်ပျက်စီးခဲ့တယ်လို့ TNLA ရဲ့ ထုတ်ပြန် ချက်အရသိရပါတယ်။
ယခုအောက်တိုဘာလတွင်းမှာဘဲ တရုတ်ရဲ့ ကြားဝင်စီစဥ်မှုနဲ့ စစ်ကောင်စီတပ်နဲ့ TNLA တို့ကြား ဆွေးနွေးပွဲ ထပ်မံရှိလာမယ်လို့ သတင်းတွေထွက်ပေါ်နေပါတယ်။
ပြီးခဲ့တဲ့ ဇူလိုင်လကစပြီး စစ်ကောင်စီရဲ့ တန်ပြန်ထိုးစစ်ဆင်တိုက်ခိုက်မှုကြောင့် TNLA အနေဖြင့် ၎င်းတို့ ထိန်းချုပ်ထားတဲ့ နောင်ချို၊ ကျောက်မဲနဲ့ သီပေါမြို့တို့ကို ပြန်လည်လက်လွတ်ခဲ့ရပြီး ယခုလက်ရှိ TNLA ထိန်းချုပ်ထားတဲ့ မြို့ ၉ မြို့ထဲမှ ၄ မြို့မှာ စစ်ကောင်စီက ဆက်တိုက်ဗုံးကြဲတိုက်ခိုက်နေတာပဲ ဖြစ်ပါတယ်။