TNLA နှင့်တော်လှန်ရေးအင်အားစုများ သိမ်းပိုက်ရရှိထားသော နောင်ချိုမြို့အား စစ်ကောင်စီက လေကြောင်းတိုက်ခိုက်မှု အဆက်မပြတ် ပြူလုပ်လျက်ရှိကြောင်း သိရသည်။
ယနေ့ နံနက် (၇) နာရီခွဲအချိန်ခန့်၌ စစ်ကောင်စီတပ်က စစ်တပ်သုံးတိုက်လေယာဉ်ဖြစ်သည့် Y12 ဖြင့် နောင်ချိုမြို့ မြို့မဈေးအနီးတစ်ဝိုက်အား ဗုံး (၅) လုံး ကြဲချတိုက်ခိုက်ခဲ့သည်။
အဆိုပါဗုံးကြဲတိုက်ခိုက်မှုကြောင့် ဈေးအနီးရှိ လှသစ္စာထမင်းဆိုင်နှင့် လူနေအိမ်တစ်လုံး ထိခိုက်ပျက်စီးခဲ့ပြီး ဒေသခံတစ်ဦး ဒဏ်ရာရရှိခဲ့သည်။
“ မနက်အစောကြီး တိုက်လေယာဉ်နဲ့ လာကြဲသွားတာဆိုတော့ ဘယ်သူမှ မထင်တဲ့အချိန်ကြီးပေါ့။ ညဈေးတန်းနားက ညောင်ပင်ပေါ်တစ်လုံးကျတယ် တော်သေးတာပေါ့ အပင်ပေါ်ကျလို့ မဟုတ်ရင် အထိအခိုက်တော်တော်များမှာဗျ။ ဈေးဆိုင်ခန်း၊ လူနေအိမ်တစ်အိမ်နဲ့ ထမင်းဆိုင်တစ်ဆိုင်ထိတယ်။” ဟု နောင်ချိုဒေသခံတစ်ဦးက HsanLoiVoice ကို စာရေးသား သတင်းပေးပို့ခဲ့သည်။
နောင်ချိုမြို့နယ် တောင်ခမ်းကျေးရွာအတွင်း စစ်ကောင်စီတပ်နှင့် TNLA တို့ တိုက်ပွဲဆက်လက်ဖြစ်ပွားလျက်ရှိကြောင်း သိရသည်။
