နောက်ဆုံးခရီးကုသိုလ်အဖြစ် မျက်လုံးနှစ်ဖက်နှင့် ကျောက်ကပ်ကို လှူလိုက်သည့် ထိုင်းရောက် မြန်မာ‌ရွှေ့ပြောင်းအလုပ်သမားတဦး

ထိုင်းနိုင်ငံမြောက်ပိုင်း၊ ချင်းရိုင်းခရိုင်နယ်မြေရှိ ပရချားနုခေါ့ဆေးရုံ၌ မြန်မာရွေ့ပြောင်းအလုပ်သမားတဦးက အခြားလူနာတဦးဆေးကုသမှုခံယူနိုင်ရန်အတွက် ၎င်း၏မျက်လုံးနှစ်ဖက်နှင့် ကျောက်ကပ်ကို လှူဒါန်းဒါနပြုလိုက်ကြောင်း ထိုင်းသတင်းများက ဖော်ပြသည့်သတင်း နာမည်ကြီးနေပါသည်။

အသက် ၄၃ နှစ်အရွယ် မြန်မာရွေ့ပြောင်းအလုပ်သမားတဦးသည် ကားအက်စီးဒင့် ပြင်းထန်ဒဏ်ရာကြောင့် ဆေးကုသမှုခံယူနေရသူတဦးဖြစ်သည်။ ထိခိုက်ဒဏ်ရာပြင်းထန်မှုကြောင့် နောက်ပိုင်း ဦးနှောက်ချို့ယွင်းပြီး ပုံမှန်ဖြစ်သွားနိုင်တော့မည်မဟုတ်ကြောင်း ထိုင်းဆရာဝန်များက ၎င်း၏ မိဘဆွေမျိုးများထံ မှတဆင့် အသိပေးအကြောင်းကြားလိုက်သည်။ ၎င်း၏ကောင်းမွန်သောခန္ဓာကိုယ်အစိတ်အပိုင်းအချို့ကို ပြန်လည်လှူဒါန်းလိုပါက ဆေးရုံမှ လက်ခံကြောင်း ပြောကြားရာ သူ၏မိဘဆွေမျိုးအသိုင်းအဝိုင်းများကလည်း လက်ခံသဘောတူခဲ့ကြောင်း သိရသည်။

အဆိုပါရွေ့ပြောင်းအလုပ်သမား၏ မိခင်၊ ညီမဖြစ်သူနှင့် မိတ်ဆွေအပေါင်းအဖော်တို့က ၎င်း၏ နောက်ဆုံးကုသိုလ်တခုဖြစ်နိုင်စေရန် ရည်ရွယ် သဘောတူ လက်ခံလိုက်ကြပြီး ထိုင်းဆေးရုံ ဆရာဝန်များက ၂၀၂၂ ခုနှစ်၊ နိုဝင်ဘာလ ၃ ရက်နေ့တွင် သူ၏ မျက်လုံးနှစ်ဖက်နှင့် ကျောက်ကပ်တို့ကို ခွဲထုတ်ယူကာ ဘန်ကောက်ရှိ ကြက်ခြေနီဌာနသို့ လွဲပြောင်းပေးပို့ခဲ့သည်ဟု သိရသည်။

၂၀၂၂ ခုနှစ်၊ နိုဝင်ဘာလ ၅ ရက်နေ့တွင် ထိုင်းကျန်းမာရေးဝန်ကြီးဌာန အကြီးအကဲတဦးဖြစ်သူ ဒေါက်တာ အိုးဖတ့်ကန် ကဝီဖုန်းက ယခုကဲ့သို့ သူ၏ ခန္ဓာကိုယ်အစိတ်အပိုင်းကို အလှူဒါနပြုသည့်အတွက် ကျေးဇူးဥပကာရတင်ရှိကြောင်း ထုတ်ဖော်ပြောကြားခဲ့သည်။ လူလူခြင်း ကူညီသည့် အလှူဒါနလုပ်ငန်းတခုဖြစ်သည်ဟုလည်း ပြောပါသည်။ သို့သော် ယခုကဲ့သို့ အလှူဒါနပြုလုပ်မည်ဆိုပါက အလှူရှင်မသေဆုံးခင်နှင့် ၎င်း၏မိဘဆွေမျိုးများကိုယ်တိုင် သဘောတူလက်ခံပြီးမှသာ ဆက်လက်ဆောင်ရွက်ကြရမည့် အလှူဒါနဖြစ်သည်ဟု ပြောပါသည်။

#HsanLoiVoice
Ref: ThaiPBS, FM91Trafficpro, Lannapost, dailynews