နေပြည်တော်ကောင်စီနယ်မြေ၊ ပျဉ်းမနားမြို့ နယ်ရှိ ငလိုက်ဆည် နှင့် ပဲခူးတိုင်း၊ ရေတာရှည်မြို့ နယ်၊ ဆွာမြို့ရှိ ဆွာဆည်မှ ရေများကို စစ်ကောင်စီ က ဖောက်ချလိုက်ခြင်းကြောင့် စစ်တောင်းမြစ်ရေလျှံတက်လာပြီး တောင်ငူမြို့နယ်မှ ပြည်သူ (၅)ထောင်ကျော် ရေဘေးသင့်ကြောင်း သိရသည်။
မိုးသည်းထန်စွာ ရွာချခြင်းမရှိဘဲ စစ်ကောင်စီ၏ အကြောင်းမဲ့ ဆည်ရေဖောက်ချမှုကြောင့် မြို့ပေါ်ရပ်ကွက်များနှင့် စစ်တောင်းမြစ်နံဘေး ကျေးရွာများတွင်လည်း ရေလွှမ်းမိုးမှုဒဏ်ခံနေရကြောင်း ဒေသခံ သတင်းရင်းမြစ်မှ သိရသည်။
မြစ်ရေလျှံတက်လာမှုကြောင့် ရေဘေးသင့် ပြည်သူ များကို လူမှုကူညီရေးအဖွဲ့များက ရေဘေးလွှတ်ရာ ပြောင်းရွေ့ပေးပြီး ယာယီဖွင့်လှစ်ထားသည့် ကယ်ဆယ်ရေးစခန်း(၅)ခုမှာ နေရာချပေးထားကြောင်းသိရသည်။
ပြီးခဲ့သည့် ဩဂုတ်လ(၂၃)ရက်နေ့က အဆိုပါတောင်ငူမြို့ကို အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က သွားရောက်ခဲ့သေးကြောင်း သိရှိရပါသည်။
