မိုးသည်းထန်စွာရွာသွန်းပြီး နမ့်တိန်းချောင်းရေ မြင့်တက်လာမှုကြောင့် သျှမ်းပြည်နယ်တောင်ပိုင်း လင်းခေးမြို့ရှိ ပုန်းထွန်ရွာနှင့် ဟွေဟေးရွာကို ဆက်သွယ်ထားတဲ့ တံတားကျိုးကျသွားကြောင်း သိရသည်။
ယနေ့ စက်တင်ဘာလ(၁၀)ရက် ညနေပိုင်းအချိန်မှာ နမ့်တိန်းချောင်းရေ ရုတ်တစ်ရက် မြင့်တက်လာမှုကြောင့် လင်းခေးမြို့ရှိ ရပ်ကွက်နှင့် ကျေးရွာတွေထဲမှာ ရေကြီးရေလျှံဖြစ်ပေါ်ပြီး ပုန်းထွန်ရွာနှင့် ဟွေဟေးရွာကို ဆက်သွယ်ထားတဲ့ တံတားလည်းကျိုးကျသွားကြောင်းသိရသည်။
” တိန်းချောင်းရေ ရုတ်တရက် တက်လာတော့ ချောင်းနဲ့နီးတဲ့ နမ့်အွန်ကျေးရွာက သူတွေ ပစ္စည်းမသယ် ယူနိုင်ဘူး၊ အသက်ကြီးပိုင်းလူကိုလည်း ကယ်ထုတ်ဖို့ အရေးပေါ်အကူအညီလိုနေတယ်၊ အခုရေက တောက် လျှောက် တက်လာနေတယ်” လို့ ဒေသခံတစ်ဦးကပြောသည်။
ရေကြီးနှစ်မြုပ်မှုကြောင့် ပူးကမ်ရွာနှင့် နမ့်အွန်ကျေးရွာများမှ သက်ကြီးဘိုးဘွားများ၊ ကလေး သူငယ်များ ကျေးရွာအတွင်း ပိတ်မိနေကြောင်း လူမှုကွန်ယက်စာမျက်နှာမှာ ဖော်ပြနေကြပါသည်။
ထို့အပြင် လင်းခေး-မိုင်းပန် သွားကားလမ်းပေါ်မှာလည်း ရေလျှံကာ ရေစီးသန်တဲ့အတွက်ကြောင့် လတ်တလောကားကြီးကားငယ် ဖြတ်သန်းသွားလာလို့မရကြောင်းနှင့် လင်းခေး-မောက်မယ် လမ်းကြား မောက်မယ် တောင်ခြေမှာ တောင်ကျချောင်းရေများ စီးဆင်းလာမှုကြောင့် ဖြတ်သန်း၍မရကြောင်း သိရသည်။
မိုးဆက်တိုက်ရွာသွန်းမှုကြောင့် လင်းခေး၊ မောက်မယ်၊ မိုင်းပန်၊ မိုင်းကိုင်၊ ကွန်ဟိန်း စတဲ့ဒေသတွေမှာ ရေကြီးရေလျှံဖြစ်ပေါ်လျက်ရှိကြောင်း သိရသည်။
Exif_JPEG_420