မကွေးတိုင်းဒေသကြီး၊ တောင်တွင်းကြီးမြို့နယ်မှ ဇော်လေးနိုင် ဇာတ်သဘင်အဖွဲ့ဟာ နေပြည်တော်၊ တပ်ကုန်းသို့ သွားရောက်ဖျော်ဖြေရန် တောင်ညိုလမ်းပိုင်းမှာ ကားတိမ်းမှောက်ပြီး ချောက်ထဲကျကာ သေဆုံးသူ ၁၂ ဦးရှိတယ်လို့ မြန်မာနိုင်ငံသဘင်အစည်းအရုံး (ဗဟို)က ထုတ်ပြန်အသိပေးထားပါတယ်။
ဇန်နဝါရီလ ၂၈ ရက် ညနေပိုင်းအချိန်က တောင်တွင်းကြီးမှ ဇာတ်အဖွဲ့တင်ဆောင်လာတဲ့ ကားဟာ နေပြည် တော် တောင်ညိုလမ်းပေါ် ဂွေးချိုကျေးရွာအနီးမှာ ကားတိမ်းမှောက်တာဖြစ်ပြီး ချောက်ထဲ ထိုးကျ သွားကာ ၁၂ ဦး ပွဲချင်းပြီး သေဆုံးတယ်လို့သိရပါတယ်။
“မြန်မာနိုင်ငံသဘင်အစည်းအရုံး(ဗဟို)မှ အခင်းဖြစ်ပွားရာနေရာသို့ အမှုဆောင်များ ကိုယ်တိုင်သွား ရောက်ပြီး လိုအပ်တဲ့ ကူညီကယ်ဆယ်မှုများ သွားရောက်ဆောင် ရွက်ပေးခဲ့တယ်” လို့ ထုတ်ပြန်ထားပါတယ်။
ဇာတ်ကားပေါ်မှာ အဖွဲ့သား ၂၇ ဦးခန့် လိုက်ပါလာတာဖြစ်ပြီး ၁၂ ဦးသေဆုံးကာ ထိခိုက်ဒဏ်ရာရရှိသူတွေ လည်း များပြားပြီး နေပြည်တော် ကုတင် ၁၀၀၀ ဆေးရုံသို့ ပို့ဆောင်ကုသထားတယ်လို့ သိရပါတယ်။
‘တောင်ညိုလမ်းဘက်က တောင်တက်တောင်ဆင်းနဲ့ အကွေ့အကောက်လည်းများတယ်၊ ပြီးတော့ ဘေးဘယ်ညာလဲ ချောက်နက်ကြီးတွေနဲ့ပါ၊ နောက်လူတွေ သတိထားနိုင်ဖို့ တခြားလမ်းကနေ သွားသင့်ပါတယ်၊ အခုလိုဖြစ်သွားတာ တကယ်စိတ်မကောင်းဖြစ်ရတယ်လို့” တပ်ကုန်းမြို့ခံတစ်ဦးက ပြောပါတယ်။
အဲ့ဒီ ဇော်လေးနိုင် ဇာတ်သဘင်ဟာ တပ်ကုန်းမြို့မှာ ယနေ့ ဇန်နဝါရီလ ၂၉ ရက်ညမှာ ကပြသွားမှာ ဖြစ်တယ်လို့ သိရပါတယ်။