သျှမ်းပြည်နယ်တောင်ပိုင်း၊ တောင်ကြီးမြို့အနီး ပလီလင်းကျေးရွာဘက်မှာ စက်သုံးဆီများကို ဘူး/ဂါလံပုံးတွေနဲ့ မရောင်းပေးလို့ မော်တာ၊ ရေစုပ်စက်၊ မီးစက်တွေ သယ်ဆောင်လာပြီး ဆီဆိုင်မှာ ဆီတန်းစီဝယ်ယူနေရတဲ့အတွက် စိုက်ပျိုးတောင်သူတွေ အခက်ကြုံနေရတယ်လို့ သိရပါတယ်။
“ ပုံးတွေနဲ့ မရောင်းပေးဘူး၊ စက်ပါမှ ရောင်းပေးမယ်ဆိုလို့ ရွာကလူတွေ ရေတင်စက်တွေ မီးစက်တွေ သယ်လာကြတာ၊ ဆိုင်ကယ်နဲ့ဆို ၄ ဘူးမဆန့်လို့ စက်တွေသယ်လာပြီး ဆီလာထည့်ကြတာ၊ တစ်ပတ်မှာ ၂ ခါပဲ ထုတ်ရတာမလို့၊ အလုပ်တော့ ပိုရှုပ်ရတာပေါ့ဗျာ” လို့ ကိုယ်တိုင်ဆီသွားတန်းသူ တောင်သူ တစ်ဦးက Hsan Loi Voice ကိုပြောပါတယ်။
အခုချိန်မှာ ကုန်စိမ်းခြံ စိုက်ပျိုးတဲ့သူတွေအနေနဲ့ ၎င်းတို့ရဲ့ စိုက်ခင်းခြံမှာ လိုအပ်တဲ့ ရေပေးဝေဖို့အတွက် စက်ကို ခုတ်မောင်းရန် ဆီဝယ်ရခက်ခဲနေတယ်လို့ သိရပါတယ်။
“ တကယ်တော့ တောင်သူဘဝတွေက ခက်ခဲပါတယ်ဗျာ၊ ဒီလိုတွေ ဆီတန်းစီပြီး မဝယ်ရင် စိုက်ခင်းထဲက အပင်တွေလည်း ပျက်စီးကုန်တော့မယ်လေ၊ မနေ့က ဓါတ်ဆီ ၁ လီတာကို ၄၇၂၅ ကျပ်နဲ့ ဝယ်ရတယ်” လို့ သူကဆက်ပြောပါတယ်။
အလားတူ ရွှေညောင်ဖက်မှာလည်း လယ်ယာသုံး ထွန်စက်အကြီးတွေ ရာကျော် ဆီတန်းစီ နေရတယ်လို့ သိရပါတယ်။