သျှမ်းပြည်နယ်ရဲ့ မြို့တော် တောင်ကြီးမှာ ပြီးခဲ့တဲ့ အပတ်က ပျောက်ဆုံးသွားတဲ့ Grade-10 ကျောင်းသား သေဆုံးလျက်ပြန်တွေ့ခဲ့တယ်လို့ မိသားစုနဲ့ နီးစပ်သူထံမှသိရပါတယ်။
အဆိုပါ ကျောင်းသားဟာ ဒီဇင်ဘာလ ၂၄ ရက်နေ့ ညနေပိုင်းက နေအိမ်မှ ဆိုင်ကယ်တစ်စီးနဲ့ ထွက်သွားကာ အိမ်သို့ ပြန်ရောက်မလာဘဲ ၆ ရက်အကြာမှာ ဘုရားဖြူဘက်က ချောက်တခုထဲမှာ သေဆုံးလျက် ပြန်တွေ့တယ်လို့ သိရပါတယ်။
သေဆုံးသူဟာ တောင်ကြီးမြို့၊ ဘုရားဖြူရပ်ကွက်မှာ နေထိုင်တဲ့ မောင်အနဂ္ဂရဲထက် (ခ) စိုင်း A ဖြစ်ပြီး တောင်ကြီး အထက(၄)ကျောင်းမှ G-10 ကျောင်းသားဖြစ်ကာ သေဆုံးချိန်မှာ အသက် ၁၆ နှစ်အရွယ် သာ ရှိသေးတယ်လို့ သိရပါတယ်။
မောင်အနဂ္ဂရဲထက် ရဲ့ နာရေးကို ဒီကနေ့ မွန်းလွဲပိုင်းက သင်္ခါရသုဿန် သို့ ပို့ဆောင်မီးသင်္ဂြိုလ်ခဲ့တယ်လို့ သိရပါတယ်။
တောင်ကြီးမြို့ဟာ စစ်ကော်မရှင်တပ်ရဲ့ အရှေ့ပိုင်းတိုင်းစစ်ဌာနချုပ်အခြေစိုက်ရာ မြို့ဖြစ်သလို မြို့ပတ် ပတ်လည်မှာလဲ စစ်တပ်နဲ့ PNO တို့ လုံခြုံရေးတင်းကြပ်ထားပေမယ့် ယခုလို လူသေဆုံးမှုတွေ ဖြစ်ပေါ်နေပြီး ခိုးဆိုးလုယက်မှုတွေလည်း မကြာခဏဖြစ်ပွားကာ တရားဥပဒေစိုးမိုးမှု ကင်းမဲ့နေတဲ့ မြို့တစ်မြို့လိုဖြစ်နေတယ်လို့ ဝေဖန်မှုတွေလည်း ရှိနေပါတယ်။