တောင်ကြီးမြို့နယ်တစ်ဝိုက်မှာ ယခု ဒီဇင်ဘာလနောက်ဆုံးပါတ်ထဲ ချယ်ရီပန်းများစတင် ပွင့်ဖူးလာတဲ့အတွက်တောင်ကြီးသစ်ပင်ချစ်သူများ အဖွဲ့က ချယ်ရီပန်းတွေ မခူးဖို့ သတိပေး ဆိုင်းဘုတ်တွေ လိုက်လံစိုက်ထူနေတယ်လို့ သိရပါတယ်။
” ချယ်ရီတွေတော်တော်မျိုးတုံးကုန်တာ လွန်ခဲ့တဲ့ နှစ်ပေါင်း ၂၀ ကျော် လောက်က ဆိုရင် တောင်ကြီး မြစိမ်းတောင် ရွှေဘုန်းပွင့် တစ်တောင်လုံး လမ်းဘေးဆိုလဲ ချယ်ရီလမ်း အဲ့သလောက်ကို ပွင့်တဲ့ ချယ်ရီမြို့ပါ လူတွေကနောက်ပိုင်း အပင်ခုတ်တော့ မျိုးတုံးလာကြတယ် ၊ထိန်းသိမ်းဖို့လိုတယ် စိုက်ပျိုး ဖို့လိုတယ်။ရှားပါးလာတဲ့ မရှိမဲ့ရှိမဲ့ ချယ်ရီပန်း ကိုမခူးကြဖို့ မေတ္တာရပ်ခံ ပါတယ်” လို့ တောင်ကြီး သစ်ပင်ချစ်သူတစ်ဦးကပြောပါတယ်။
ယခု ရက်ပိုင်းအတွင်း တောင်ကြီး ရွှေဘုန်းပွင့် ဘုရားတောင်တက်လမ်းတစ်လျှောက် ချယ်ရီပန်းများစတင် ဖူးငုံလာပြီး ယခင်နှစ်တွေထက် ချယ်ရီစောပွင့် တယ်လို့ သိရပါတယ်။
ဒါ့ကြောင့် ချယ်ရီပန်းပင်စတင်ပွင့်လာချိန်မှာ ချယ်ရီပန်းကို ခူးခြင်း၊ ခုတ်ရောင်းခြင်းတွေ မပြုလုပ်ဖို့ ကိုလည်း တောင်ကြီး သစ်ပင်ချစ်သူများအဖွဲ့ကတောင်းဆိုထားပါတယ်။
ချယ်ရီပန်းတွေဟာ ပင်လယ်ရေ မျက်နှာပြင်အထက် ပေပေါင်း ၃၀၀၀ နဲ့ ပေ ၄၀၀၀ ကျော် ရှိတဲ့ တောင် ပေါ်ဒေသတွေမှာသာပွင့် တဲ့အအေးကြိုက် တောင်ပေါ်ပန်းတစ်မျိုးဖြစ်ပြီး မြေပြန့်ဒေသတွေမှာ ရှင်သန်ပေါက်ရောက်နိုင်ခြင်း မရှိတဲ့ပန်းတစ်မျိုးဖြစ်ပါတယ် ။