သျှမ်းပြည်နယ်၏မြို့တော် တောင်ကြီးမြို့၌ ယနေ့ အောက်တိုဘာလ (၂၉) ရက်နေ့က စတင်ပြီး လိုင်စင်မဲ့မော်တော်ယာဉ်များနှင့် စည်းကမ်းမဲ့မော်တော်ယာဉ်များအား စတင်ဖမ်းဆီးနေပြီဖြစ်သည်။
ယနေ့ နေ့လည်ပိုင်းကစတင်ပြီး ယာဉ်ထိန်းရဲအပါအဝင် ဌာနပေါင်းစုံမှဝန်ထမ်းများပါဝင်သည့်အဖွဲ့က တောင်ကြီးမြို့လူစည်ကားရာနေရာများဖြစ်သော တောင်ကြီးတက္ကသိုလ်အနီးတစ်ဝိုက်၊ အနောက်မြို့ပတ်လမ်း ဝါးပြားမီးပွိုင့်လမ်းဆုံအနီး၊ အရှေ့မြို့ပတ်လမ်း အဆုတ်ဆေးရုံအနီး၊ အထက-၄ အနီး နတ်စင်နား ၊ ၁၆ ထပ်တိုက်အနီး၊ မြင်းရုပ်အနီး ဘုရားဖြူအတက် လမ်းဆုံ တို့တွင် စောင့်ဆိုင်းစစ်ဆေးနေသည်ဟု တောင်ကြီးဒေသခံတစ်ဦးက ပြောပြသည်။
“ သတင်းကတော့အမျိုးမျိုးထွက်နေတယ် တောင်ကြီးမှာ လိုင်စင်မဲ့ကားတွေ စည်းမဲ့ကမ်းမဲ့မောင်းပြီး တိုက်ပြေးတာတွေများလာလို့ အတိုင်အတောများလာရာကနေ လိုင်စင်မဲ့ကားတွေ ဖမ်းမယ်လို့ မနေ့ကတည်းက ကြားရတယ်။ ဒီနေ့ နေ့လည်ပိုင်းလောက်ကစပြီး အနောက်မြို့ပတ်လမ်း ဧရာဝတီကဖေးနားမှာ ဦးထုပ်မဆောင်းတဲ့ ဆိုင်ကယ်တွေကို လိုင်စင်ပါစစ်ပြီး ဖမ်းဆီးတာတွေလုပ်နေတယ်။ လိုင်စင်မဲ့ကားတွေလည်း ဖမ်းပြီး မော်တော်ပီကယ်ရုံးကို တခါတည်းတန်းပို့နေတယ်။” ဟု တောင်ကြီးဒေသခံတစ်ဦးကပြောသည်။
“ တောင်ကြီးတန်ဆောင်တိုင်နီးလာတိုင်း ယာဉ်ထိန်းရဲတွေလုပ်နေကျပါ။ တောင်ကြီးသားတွေတော့ ဒီအထာတွေကို ရိုးနေပါပြီ။ ဒီအတောအတွင်းတော့ ၂ ထပ်ရပ်တဲ့ကားတွေ ၊ ဦးထုပ်မဆောင်းဘဲ ဆိုင်ကယ်စီးတဲ့သူတွေ ၊ လိုင်စင်မဲ့တွေ သတိထားရမယ်ဗျ။ ဒီကာလမှာ ဘာမှ ညှိနှိုင်းခွင့်မပေးဘဲ တခါတလေ ကားသိမ်းတာတွေ လူကိုပါ ထောင်ချမယ်လို့ ခြိမ်းခြောက်တာတွေပါ လုပ်တတ်တယ်ဗျ။” ဟု နောက်ထပ်တောင်ကြီးသားတစ်ဦးက ပြောပြသည်။
ဒါ့အပြင် တောင်ကြီးမြို့အဝင်အထွက်များတွင်လည်း လိုင်စင်မဲ့မော်တော်ယာဉ်များအား စစ်ဆေးလျက်ရှိကြောင်း သတင်းရရှိသည်။