သျှမ်းပြည်နယ်တောင်ပိုင်း၊ တောင်ကြီးမြို့ အဝေရာမီးပုံးပျံကွင်းတွင် ယမန်နေ့ ဇွန်လ (၂၆) ရက်နေ့က အပြည်ပြည်ဆိုင်ရာမူးယစ်ဆေးဝါးတိုက်ဖျက်ရေးနေ့အဖြစ် သျှမ်းပြည်နယ်အတွင်း ဖမ်းဆီးရမိထားသော မူးယစ်ဆေးဝါးများကို မီးရှို့ဖျက်ဆီးသည့် အခမ်းအနားကျင်းပပြုလုပ်ခဲ့သည်။
အဆိုပါ အခမ်းအနားကို စစ်ကောင်စီလက်အောက်ခံ သျှမ်းပြည်နယ်အစိုးရအဖွဲ့မှ ဦးဆောင်ကျင်းပခြင်းဖြစ်ပြီး ၎င်းအခမ်းအနားကို တောင်ကြီးမြို့ရှိ ကျောင်းသားကျောင်းသူများအား တက်ရောက်စေခဲ့ကြောင်း သိရသည်။
တက်ရောက်ခဲ့သော ကျောင်းသားကျောင်းသူများသည် မူးယစ်ဆေးဝါးမီးရှို့စဉ် ၎င်းအငွေ့များကို ရှူရှိုက်မိပြီး သတိမေ့လဲကျမှုများစွာ ဖြစ်ပေါ်ခဲ့ကြောင်း သိရသည်။
မူးယစ်ဆေးဝါးမီးရှို့ဖျက်ဆီးခြင်းကို နှစ်စဉ်ကျင်းပပြုလုပ်ခဲ့သော်လည်း ယခုနှစ်တွင်မှ ကျောင်းသားကျောင်းသူများအား တက်ရောက်စေခဲ့ခြင်းဖြစ်သည်။
