သျှမ်းပြည်နယ်အရှေ့ပိုင်း မိုင်းဖြတ်မြို့နယ် နမ့်နန်းကျေးရွာအကျော်၌ ယနေ့ (၂၄.၄.၂၀၂၃) ရက်နေ့ နံနက် (၇း၃၀) ဝန်းကျင်ခန့်တွင် တာချီလိတ်မှ မိုင်းယောင်းသို့ ဘုရားဖူးထွက်လာသည့် အိမ်စီးကား VIGO တစ်စီး မတော်တဆတိမ်းမှောက်ပြီး ချောက်ထဲကျသွားခဲ့ကြောင်း သတင်းရရှိသည်။
အဆိုပါမတော်တဆမှုကြောင့် ယာဉ်ပေါ်ပါသူ (၆) ဦးအနက် (၃) ဦးသေဆုံးပြီး (၁) ဦးပြင်းထန်စွာဒဏ်ရာရရှိခဲ့သည်။
“ နံနက် (၇း၃၀) လောက်ကျနော်တို့ကို ဖုန်းဆက်ပြီး အကြောင်းကြားလာပါတယ်။ အဲ့မှာကျနော်တို့ (၈း၃၀) လောက်ရောက်တော့ တချို့အဖွဲ့တွေတော့ ရောက်နှင့်နေပြီ။ အရေးပေါ်ဖြစ်တဲ့သူတွေကိုတော့ ဆေးရုံခေါ်သွားနေပြီ။ ဆေးရုံမှာပဲ အမျိုးသမီး (၃) ယောက်ဆုံးသွားတယ်။ ကားပေါ်မှာ (၆) ယောက်ပါတယ် အမျိုးသားကတော့တစ်ယောက်ပဲပါတယ်။ အမျိုးသမီးနောက်တစ်ယောက်လည်း စိုးရိမ်ရတဲ့အနေအထားပဲ။ အကုန်လုံးက လူကြီးပိုင်းတွေ အသက် (၅၀) ကျော်ဝန်းကျင်တွေပဲ။ အကုန်လုံးသျှမ်းလူမျိုးတွေ တာချီလိတ်ကနေ မိုင်းယောင်းကိုဘုရားဖူးသွားရင်းဖြစ်တာ။ မိုးကလည်းနည်းနည်းရွာထားတယ် ကားကလည်းအရှိန်နည်းနည်းပြင်းမယ်ထင်တယ် အကွေ့မှာအရှိန်မထိန်းနိုင်ဘဲ ချောက်ထဲကျသွားတာ။” ဟု မိုင်းဖြတ်မြို့နယ် လူမှုကူညီရေးအသင်းမှ အဖွဲ့ဝင်တစ်ဦးကပြောပြသည်။
စိုးရိမ်ရသည့် ဒဏ်ရာရရှိသော အမျိုးသမီးတစ်ဦးကိုလည်း ထိုင်းနိုင်ငံသို့ သွားရောက်ကုသမှုခံယူနေပြီဟု သိရသည်။
