သျှမ်းပြည်နယ်အရှေ့ပိုင်း၊ တာချီလိတ် မြို့နယ်၊ ဆန်ဆိုင်း(ခ)ရပ်ကွက်ရှိ ဆန်ဆိုင်း(၅)လမ်း ကြားတွင် ယမန်နေ့ နိုဝင်ဘာလ(၈)ရက်နေ့ ည(၁၁း၃၀)နာရီခန့်အချိန်က အမျိုးသားတစ်ဦး သေနတ်ပစ်ခတ်ခံရကြောင်း သိရှိရသည်။
ဆန်ဆိုင်း(ခ) ၅ လမ်းသွယ်ထဲတွင် အမျိုးသားတစ်ဦး သွေးထွက်ဒဏ်ရာများဖြင့် အော်နေပါသဖြင့် အရေးပေါ် အကူအညီတောင်းခံပြီး မြို့တွင်းကူညီရေးအဖွဲ့များ သွားရောက်ကာ ခြေနှင့်ပေါင်ထိခိုက်ပြဲရှဒဏ်ရာ အမျိုးသားတစ်ဦးအား ဦးလှမိုး(တာချီလိတ်)လူမှုကူညီရေးအသင်းမှ တာချီလိတ်ပြည်သူ့ဆေးရုံကြီးသို့ ပို့ဆောင်ကူညီပေးခဲ့ကြောင်း သိရသည်။
အဆိုပါ ပစ်ခတ်မှုဖြစ်ပွားရာနေရာသို့ တာဝန်ရှိသူများက လာရောက်စစ်ဆေးလျက်ရှိကာ မည်သည့် အဖွဲ့အစည်းမှ ပစ်ခတ်သွားသည်ကို စုံစမ်းစစ်ဆေးနေကြောင်း သိရသည်။
တာချီလိတ်မြို့သည် နယ်စပ်မြို့ဖြစ်တာနဲ့အညီ လူပေါင်းစုံ လာရောက်လုပ်ကိုင်စားသောက်ကြပြီး အဖွဲ့အစည်းပေါင်းစုံရှိကာ မကြာခဏ ဆိုသလို ပြန်ပေးဆွဲမှု၊ လုယက်မှုနှင့် ပစ်ခတ်မှုတွေရှိကြောင်း သိရသည်။
