တာချီလိတ်မြို့ရှိ KTV (၆) ခုအား ဗီဒီယိုလုပ်ငန်း စိစစ်ကြီးကြပ်ရေးကော်မတီမှ ဝင်ရောက်စစ်ဆေးပြီး KTV (၅) ဆိုင်အား ယာယီပိတ်ခိုင်းထားဟုဆို

သျှမ်းပြည်နယ်အရှေ့ပိုင်း တာချီလိတ်မြို့နယ် မြန်မာ-ထိုင်း နယ်စပ်တစ်လျောက် ညပိုင်းဖွင့်လှစ်သော နာမည်ကြီး KTV (၆) ဆိုင်အား ယမန်နေ့ နေလည်ခန့်က ဗီဒီယိုလုပ်ငန်း စိစစ်ကြီးကြပ်ရေးကော်မတီမှ ဝင်ရောက်စစ်ဆေးခြင်းများ ပြုလုပ်ခဲ့ကြောင်း သတင်းရရှိသည်။

စစ်ဆေးခြင်းခံရသော KTV ဆိုင်များသည် တာချီလိတ်မြို့ ဝိန်းကျောက်ရပ်ကွက်အတွင်းရှိ ရွှေဘူးသီး KTV၊ ကြီးမြတ်သောရွှေမြင်း PUB၊ ကိုးထပ် KTV၊ DAT Bar & KTV၊ 1G1 KTV နှင့် Harry Potter KTV တို့ဖြစ်သည်။ ထို့အထဲတွင် ဘူးသီး KTV၊ ကြီးမြတ်သောရွှေမြင်း PUB၊ ကိုးထပ် KTV၊ DAT Bar & KTV နှင့် Harry Potter KTV စသည့် KTV (၅) ဆိုင်အား စည်းကမ်းချက်များကို လိုက်နာခြင်းမရှိသောကြောင့်ဟုဆိုကာ ယာယီပိတ်ခိုင်းထားကြောင်း သိရသည်။

တာချီလိတ်မြို့နယ်အတွင်းရှိ KTV နှင့် ဘားများကို ဆက်လက်စစ်ဆေးမှုများ ဆောင်ရွက်မည်ဖြစ်သလို တစ်နိုင်ငံလုံးရှိ KTV နှင့် ဘားများကိုလည်း စစ်ဆေးသွားမည်ဖြစ်ကြောင်း သတင်းရရှိသည်။