သျှမ်းပြည်အရှေ့ပိုင်း၊ တာချီလိတ်မြို့၊ မယ်ခေါင်(၂)ရပ်ကွက်၊ မယ်ခေါင်(၂)လမ်းအတွင်းရှိ ဟိုတယ်လိုင်စင် ရယူထားခြင်းမရှိတဲ့ အပြည်ပြည်ဆိုင်ရာဟိုတယ် အဆောက်အအုံမှာ ကျားဖြန့်လုပ်ငန်း လုပ်ကိုင်နေတဲ့ တရုတ်နိုင်ငံသား အပါအဝင် နိုင်ငံခြားသား ၄၀၀ နီးပါးခန့်ကို ဆက်စပ်ပစ္စည်းများနဲ့ အတူ ယမန်နေ့ မွန်းလွဲပိုင်းက ဖမ်းဆီးရမိခဲ့တယ်လို့ စစ်ကော်မရှင်ရဲ့ ယနေ့ထုတ် သတင်းစာမှာ ဖော်ပြထား ပါတယ်။
တာချီလိတ်မြို့နယ်အတွင်း လုံခြုံရေးဆောင်ရွက်နေတဲ့ ပူးပေါင်းအဖွဲ့တွေက ၎င်းဟိုတယ်အတွင်းသို့ ဝင်ရောက်ရှာဖွေ စစ်ဆေးရာ တရုတ်နိုင်ငံသား ၂၉၇ ဦး (အမျိုးသား ၂၈၉ ဦး၊ အမျိုးသမီး ၈ ဦး)၊ မလေးနိုင်ငံသား ၃၈ ဦး (အမျိုးသား ၃၀ ဦး၊ အမျိုးသမီး ၇ ဦး)၊ ဗီယက်နမ်နိုင်ငံသား ၅၇ ဦး (အမျိုးသား ၄၆ ဦး၊ အမျိုးသမီး ၁၁ ဦး)၊ ဖိလစ်ပိုင်နိုင်ငံသား အမျိုးသမီး ၁ ဦး စုစုပေါင်း နိုင်ငံခြားသား ၃၉၃ ဦး တို့ကို ဖမ်းဆီးရမိခဲ့တယ်လို့ ဆိုပါတယ်။
ဒါ့အပြင် အွန်လိုင်းလိမ်လည်လောင်းကစားမှုမှာ အသုံးပြုတဲ့ ကွန်ပျုတာ ၁၇၄ လုံး၊ CPU အလုံး ၇၀၊ Star Link ၉ လုံး၊ ဖုန်းမျိုးစုံ ၂၃၃ လုံးနဲ့အတူ ဆက်စပ်ပစ္စည်းများ သိမ်းဆည်းရမိခဲ့တယ်လို့ ဖော်ပြထား ပါတယ်။
ဖမ်းဆီးရမိတဲ့ နိုင်ငံခြားသားများကို သက်ဆိုင်ရာနိုင်ငံများသို့ ပြန်လည်လွှဲပြောင်းနိုင်ဖို့ လုပ်ထုံးလုပ်နည်း နဲ့အညီ ဆောင်ရွက်သွားမှာဖြစ်ပြီး သိမ်းဆည်းရမိတဲ့ ဆက်စပ်ပစ္စည်းတွေကိုလည်း ထပ်မံအသုံးမပြု နိုင်အောင် စနစ်တကျ ဖျက်ဆီးသွားမယ်လို့ ထုတ်ပြန်ထားပါတယ်။
Photo – MOI