မြန်မာ−ထိုင်းနယ်စပ် တာချီလိတ်မြို့နယ်မှာ အွန်လိုင်းလိမ်လည်လောင်းကစားလုပ်ငန်း(ကျားဖြန့်) လုပ်ကိုင်တဲ့ ပြည်ပနိုင်ငံသား ၁၂၆ ဦးကို ဆက်စပ်ပစ္စည်းတွေနဲ့အတူ ဖမ်းဆီးရမိခဲ့တယ်လို့ သိရပါတယ်။
တာချီလိတ်မြို့ရဲ့ အနောက်မြောက်ဘက် မီတာ ၁၃၀၀၀ ခန့်အကွာ ပန်ကူကျေးရွာ အနီးမှာ ဧပြီလ ၇ ရက် နေ့လည် ၁ နာရီခွဲအချိန်က လုံခြုံရေးတပ်ဖွဲ့တွေ ပါဝင်တဲ့ ပူးပေါင်းဖွဲ့တွေ သွားရောက်စစ်ဆေးရာ အိပ်ဆောင်နဲ့ လုပ်ငန်းဆောင် အပါအဝင် အဆောက်အအုံ ၉ လုံးတွေ့ရှိပြီး အဆောင်အတွင်းမှ တရုတ် နိုင်ငံသား ၁၂၅ ဦးနဲ့ လာအိုနိုင်ငံသား ၁ ဦး စုစုပေါင်း ၁၂၆ ဦး ဖမ်းဆီးရမိခဲ့တယ်လို့ စစ်အုပ်စုက ထုတ်ပြန် ထားပါတယ်။
ဒါ့အပြင် အွန်လိုင်းလိမ်လည်လောင်းကစားလုပ်ငန်း ဆက်စပ်ပစ္စည်းတွေဖြစ်တဲ့ မော်နီတာ ၁၂၀ လုံး၊ System ပုံး ၉၇ လုံး၊ All in One Computer ၄၆ လုံး၊ Star Link ၁၂ လုံး၊ ဝိုင်ဖိုင်စက် ၁၂ လုံး၊ ဖုန်းမျိုးစုံ ၁၀၅ လုံးနဲ့ မီးစက်ကြီး ၁ လုံးတို့ တွေ့ရှိသိမ်းဆည်းရမိခဲ့တယ်လို့ ဆိုပါတယ်။
ဖမ်းဆီးရမိသူတွေကို ဥပဒေနဲ့အညီ ထိရောက်စွာ အရေးယူသွားမှာဖြစ်ပြီး နောက်ကွယ်မှ ပါဝင်ပတ်သက်သူကိုလည်း ဆက်လက်စိစစ်ဖော်ထုတ် အရေးယူသွားမယ်လို့ သိရပါတယ်။
Photo – MOI