သျှမ်းပြည်အရှေ့ပိုင်း၊တာချီလိတ်မြို့မှာအသက် ၂၀ ကျော် အမျိုးသမီးငယ်တစ်ဦးကို မိသားစုဝင်များထံအသိမပေးပဲ ရဲတပ်ဖွဲ့က အလောင်းကို မီးရိူ့သဂြိုလ် ခဲ့တယ်လို့ တာချီလိတ် မြို့ခံတွေဆီက သိရပါတယ်။
” တရားမျှတမှု မရှိဘဲ ရက်ရက်စက်စက် အသက်ဆုံးရှုံးသွားရတဲ့ ကျွန်မရဲ့ညီမလေးအတွက် အမှန်တရားကို လိုချင်ပါတယ် ။ ပိုပြီး စိတ်မကောင်းဖြစ်ရတာကတော့ ညီမလေးရဲ့ ရုပ်အ လောင်း (DB) ကို ပြန်တွေ့တဲ့အချိန်မှာ မိသားစုကို အ ကြောင်းမကြားခဲ့သလို၊ ဘာကြောင့် ဒီလိုရုပ်ပျက်ဆင်းပျက် ဖြစ်နေရသလဲဆိုတဲ့ အကြောင်းရင်းကိုလည်း မစုံစမ်းခဲ့ကြပါဘူး။
ဒါတင်မကသေးဘဲ မိသားစုဝင်တွေကို အသိမပေးဘဲ သဂြိုဟ်ပစ်လိုက်တယ်လို့ သိရတဲ့အတွက် ကျွန်မတို့ မိသားစုမှာ ဘယ်လိုမှ ဖြေမဆည်နိုင်အောင် ခံစားနေရပါတယ်။ကျွန်မတို့ ညီမလေး အိမ်ပြန်မလာတာ ၃ ရက်လောက်ရှိလို့ အဆက်အ သွယ်ပြတ်ပြီး စိုးရိမ်တကြီး ရှာဖွေနေခဲ့ရတာပါ။ ” လို့ သေဆုံးသူ မိသားစုဝင်တစ်ဦးက လူမှုကွန်ရက်မှာ ရေးသားထားပါတယ်။
သေဆုံးသူရဲ့ မိသားစုဝင်တွေဟာ ပြီးခဲ့တဲ့ရက် ပိုင်း(အလောင်းမတွေ့ခင်အချိန် ) ကတည်းက ရဲစခန်းကို လူပျောက်အမှုဖွင့် တိုင်ကြားခဲ့ပေမဲ့ အလောင်းပြန်တွေ့ချိန် ရဲတပ်ဖွဲ့က မိသားစုဝင်တွေကိုအသိမပေးပဲ မီးသဂြိုလ်လိုက်တာဖြစ်တယ်လို့ ဆိုပါတယ်။
သေဆုံးသူအမျိုးသမီးငယ်ဟာ သတ်ဖြတ်ခံထားရတဲ့ ပုံစံနဲ့ လမ်းဘေးမှာစောင်နဲ့ထုတ်ပိုးပြီးစွန့်ပစ်ခံခဲ့ရတာဖြစ်တယ်လို့ မြို့ခံတွေကဆိုပါတယ်။
မိသားစုဝင်တွေ မသိလိုက်ပဲ အလောင်းကို မီးရိူ့သဂြိုလ်ခဲ့တဲ့ တာချီလိတ်မြို့က လူမှုကူညီရေးအသင်းနဲ့ ရဲတပ်ဖွဲ့အပေါ် မြို့ခံတွေကမေးခွန်ထုတ်နေကြပြီး အပြစ်ရှိသူများကို အမြန်ဆုံးဖော်ထုတ်ဖမ်းဆီးပေးဖို့တောင်းဆိုနေကြပါတယ်။
တာချီလိတ်မြို့မှာ ယခုရက်ပိုင်းအတွင်း လူပျောက်ကြော်ငြာများ ဆက်တိုက်တွေ့နေရပြီး အများစုမှာ လူငယ် အမျိုးသား/အမျိုးသမီးတွေဖြစ်တယ်လို့ မြို့ခံတွေဆီက သိရပါတယ်။