သျှမ်းပြည်နယ်အရှေ့ပိုင်း၊ တာချီလိတ်မြို့၊ ဆန်ဆိုင်း (ခ) ရပ်ကွက်ရှိ နေအိမ်တစ်လုံးပေါ် မြေပြိုကျခဲ့ပြီး အိမ်တွင်းနေထိုင်သူ လင်မယား ၂ ဦးသေဆုံးခဲ့ကြောင်း တာချီလိတ် ၊ ဆန်ဆိုင်း ရပ်ကွက်နေ ပြည်သူတစ်ဦးထံမှ သိရသည်။
“ ဖြစ်သွားတာက ကျွန်တော့အစ်ကို နေတဲ့ အိမ်နဲ့ တစ်ဝန်းထဲပဲ၊ ဖြစ်တဲ့အိမ်က ပန်းရံလုပ်တဲ့ လင်မယားအိမ် ၊ ဒီမြို့ကတော့မဟုတ်ဘူး စိတ်မကောင်းစရာပဲ လင်မယား ၂ ယောက်လုံး အသက်မရှင်ဘူး” ဟု ၄င်းကပြောသည်။
ယမနေ့ ည ( မေလ ၁၃ ရက်) က မိုးသည်းထန်စွာရွာသွန်းပြီးနောက် ယနေ့နံနက် ၄ နာရီအချိန်ခန့်က တာချီလိတ်မြို့ ဆန်ဆိုင်း (ခ) ရပ်ကွက် (ဈ) ကွက်သစ်ရှိ လူနေအိမ်တစ်လုံးပေါ် မြေပြိုကျခဲ့ခြင်းဖြစ်သည်။
အခင်းဖြစ်ပွားရာနေရာသို့ တာချီလိတ်အခြေစိုက်လူမှုကူညီရေးအသင်းများ ရောက်ရှိလာပြီး ကယ်ဆယ်ရေး လုပ်ငန်များဆောင်ရွက်ကာ ယနေ့နံနက် ၈ နာရီ ချိန်ခန့်က သေဆုံးရုပ်အလောင်းများကို တူးဖော်နိုင်ခဲ့ပြီး တာချီလိတ် ဆေးရုံရင်ခွဲရုံကို ပို့ဆောင်ပေးခဲ့ကြောင်း သိရသည် ။
မေလ ၁၃ ရက်ညဦးပိုင်းကတည်းက သျှမ်းပြည်နယ် တောင်ပိုင်းနှင့် အရှေ့ပိုင်းများတွင် မိုးသည်းထန်စွာ ရွာသွန်းခဲ့ပြီး မိုခါမုန်တိုင်း၏ အရှိန်ကြောင့် မိုးကြီးနိုင်ပြီး မြေပြိုကျခြင်း ၊ သစ်ပင်အိုများ ၊ အုတ်တံတိုင်းများ လဲကျခြင်း ဖြစ်ပွားနိုင်ကြောင်မိုးလေဝသပညာရှင်များက သတိပေးထားသည်။
