မြန်မာ-တရုတ် နှစ်နိုင်ငံ နယ်စပ်များတွင် ယာယီနယ်စပ်ဖြတ်သန်းဝင်ရောက်ခွင့်ကတ်များအား စက်တင်ဘာလ (၄) ရက်နေ့က စတင်ပြီး အကန့်အသတ်မရှိ စတင်ထုတ်ပေးလျက်ရှိကြောင်း သတင်းရရှိသည်။
ယာယီဝင်ထွက်ခွင့များအား မြန်မာနိုင်ငံသားမှတ်ပုံတင်ကိုင်ဆောင်ထားသူ မည်သူမဆို ထုတ်ပေးမည်ဟုဆိုသည်။ ယာယီဝင်ထွက်ခွင့်သည် မြန်မာငွေ (၁၀၀၀) ကျပ်သာ ကုန်ကျမည်ဖြစ်ပြီး တရုတ်နိုင်ငံ၌ (၆) ညအိပ် (၇) ရက် နေထိုင်ခွင့်ရှိကြောင်း သိရသည်။ အဆိုပါကတ်များသည် တရုတ်နိုင်ငံ ကျယ်ခေါင်မြို့နှင့် ရွှေလီမြို့အထိ အကျုံးဝင်အသုံးပြုနိုင်သည်။
“အခုကတော့ မူဆယ်မှာရှိတဲ့ ဝင်ထွက်ဂိတ်တွေမှာ အရင်တုန်းကလိုမျိုး ဝင်ထွက်ခွင့်ကတ်တွေကို ပြန်ထုတ်ပေးနေပြီပေါ့နော်။ ပြောထားတာတော့ တစ်ယောက်ကို (၁၀၀၀) ကျပ်လို့ ဆိုပေမယ့် လက်တွေ့မှာတော့ (၂၀၀၀) ကျပ်လောက်တော့ ကုန်ပါတယ်။ လူအရမ်းများတော့ မနက်အစောကြီး သွားတန်းစီနိုင်မှာပဲ ရတယ်။”ဟု မူဆယ်ဒေသခံတစ်ဦးကပြောပြသည်။
ယာယီဝင်ထွက်ခွင့်ကတ်များကို မူဆယ်မြို့နယ်ရှိ နန်းတော်ဂိတ်၊ ဆင်ဖြူဂိတ်နှင့် မန့်ဝိန်းဂိတ် စသည့် ဂိတ် (၃) ခုတွင် စတင်ထုတ်ပေးနေပြီဟု သတင်းရရှိသည်။