ဒီကနေ့ သျှမ်းပြည်နယ်မြို့တော် တောင်ကြီးမြို့ရှိ လွှတ်တော်အဆောက်အအုံမှာ ကျင်းပတဲ့ တတိယအကြိမ် ရှမ်းပြည်နယ်လွှတ်တော် ပထမပုံမှန်အစည်းအဝေးမှာ NLD အစိုးရလက်ထက်က ဝန်ကြီးဖြစ်ခဲ့တဲ့ စိုင်းလုံကျော် ကို ရှမ်းပြည်နယ်လွှတ်တော် ဥက္ကဋ္ဌအဖြစ် ရွေးချယ်တင်မြောက်ခဲ့တယ်လို့ သိရပါတယ်။
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီမှ ဖယ်ခုံမြို့နယ် မဲဆန္ဒနယ် အမှတ်(၂)မှ ပြည်နယ်လွှတ်တော် ကိုယ်စားလှယ် ဦးစိုင်းလုံကျော် အား ဥက္ကဋ္ဌ နဲ့ မိုင်းပျဥ်းမြို့နယ် မဲဆန္ဒနယ် အမှတ်(၁)မှ ပြည်နယ် လွှတ်တော်ကိုယ်စားလှယ် စိုင်းထွန်းစိန် အား ဒုဥက္ကဋ္ဌအဖြစ် ရွေးချယ်တင်မြောက်ခဲ့တာ ဖြစ်ပါတယ်။
ရှမ်းပြည်နယ်လွှတ်တော် ဥက္ကဋ္ဌ ဖြစ်လာတဲ့ ဦးစိုင်းလုံကျော် ဟာ သျှမ်း(တောင်) ကြံ့ခိုင်ရေးပါတီရဲ့ ပြည်နယ်ဥက္ကဋ္ဌ ဖြစ်သလို NLD အစိုးရလက်ထက်က ရှမ်းပြည်နယ်အစိုးရအဖွဲ့မှာ စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး အဖြစ် တာဝန်ထမ်းဆောင်ခဲ့ဖူးသူလည်း ဖြစ်ပါတယ်။
ယနေ့ ကျင်းပတဲ့ ရှမ်းပြည်နယ်လွှတ်တော်မှာ ပြည်ထောင်စုကြံခိုင်ရေးနှင့် ဖွံ့ဖြိုးရေးပါတီ (USDP)မှ ၅၉ ဦး၊ ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP)မှ ၂ဝ ဦး၊ ပအိုဝ်းအမျိုးသားအဖွဲ့ချုပ်ပါတီ (PNO) မှ ၁၁ ဦး၊ အင်းအမျိုးသားအဖွဲ့ချုပ်ပါတီမှ ၃ ဦး၊ ဓနုတိုင်းရင်းသားလူမျိုးများ ဒီမိုကရေစီပါတီမှ ၃ ဦး၊ တိုင်းရင်းသားစည်းလုံးညီညွတ်ရေးပါတီမှ ၂ ဦး၊ အာခါအမျိုးသား ဖွံ့ဖြိုးတိုးတက်ရေးပါတီမှ ၁ ဦးနဲ့ တပ်မတော်သားလွှတ်တော်ကိုယ်စားလှယ် ၃၃ ဦးတို့ တက်ရောက်ခဲ့တယ်လို့ သိရပါတယ်။