ပြည်တွင်းရှိ လူငယ်လူရွယ်တွေကို ပုံစံအမျိုးမျိုးနဲ့ ပေါ်တာဆွဲဖမ်းဆီးနေတဲ့ စစ်အုပ်စုက စစ်တပ်ထဲသို့ ဝင်ရောက်တာဝန်ထမ်းဆောင်ကြသူတွေဟာ ကိုယ့်သဘောဆန္ဒအလျောက် ဝင်ရောက်လာကြသူတွေ ဖြစ်တယ်လို့ အာဏာသိမ်း စစ်ခေါင်းဆောင် မင်းအောင်လှိုင် က အရှက်မဲ့ပြောကြားခဲ့ပါတယ်။
ဇန်နဝါရီ ၁၉ ရက်နေ့က သျှမ်းပြည်နယ်အရှေ့ပိုင်း၊ ကျိုင်းတုံမြို့၊ ကြိဂံဒေသတိုင်းစစ်ဌာနချုပ်မှာ တပ်နယ်ရှိ အရာရှိ၊ စစ်သည်၊ မိသားစုတွေနဲ့ တွေ့ဆုံချိန်မှာ စစ်ခေါင်းဆောင်က ထိုသို့ ပြောကြားခဲ့တာ ဖြစ်ပါတယ်။
နိုင်ငံတော်ကို ကာကွယ်လိုတဲ့စိတ်နဲ့ ဝင်ရောက်လာကြတဲ့ တပ်မတော်သား အားလုံးကို မိမိအနေနဲ့ အသိအမှတ်ပြုသလို တပ်သားတွေရဲ့ ဝတ်စားဆင်ယင်မှုမှအစ စားသောက်နေထိုင်ရေးအထိ ဖြည့်ဆည်းဆောင်ရွက်ပေးလျက်ရှိပြီး အဲ့လိုလုပ်ဆောင်ပေးတာဟာ မိမိတို့ သဘောဆန္ဒအလျောက် တပ်ထဲဝင်ရောက် လာတဲ့ စိတ်ဓာတ်ကို အသိအမှတ်ပြုတာဖြစ်တယ်လို့ စစ်ခေါင်းဆောင်က ပြောပါတယ်။
ဒါ့အပြင် “အမြဲတိုက်ပွဲဝင် အသင့်ဖြစ်စေရေး ကိုယ်ခန္ဓာကြံ့ခိုင်မှု ရှိရန်လိုအပ်ပြီး ရဲစွမ်းသတ္တိရှိရန်လည်း ဆောင်ရွက်နေရန်လိုမယ်၊ သင်ကြားထားတဲ့ စစ်အတတ်ပညာတွေကို စစ်မြေပြင်မှာ အပြည့်အဝ အသုံးချနိုင်ရန် လိုတယ်” လို့ ဆိုပါတယ်။
တကယ့်လက်တွေ့မှာ အာဏာသိမ်းစစ်တပ်က စစ်မှုထမ်းဥပဒေပြဋ္ဌာန်းပြီး အရွယ်ရောက်ပြီး လူငယ်/ လူရွယ်တွေကို အဓမ္မ စစ်မှုထမ်းခိုင်းတာ၊ ပေါ်တာဆွဲဖမ်းဆီးတာတွေ စစ်မှုထမ်းစာရင်းပါသူတွေကို အိမ်တိုင်ရာရောက် ဖမ်းဆီးခေါ်ဆောင်တာတွေ လုပ်ဆောင်လေ့ရှိပါတယ်။
ဒါ့အပြင် စစ်မှုထမ်းနာမည်စာရင်းပါရှိပြီး မလိုက်နိုင်ပါက ငွေကြေး သိန်းဆယ်ချီ ပေးဆောင်ရတာ ရှိသလို စစ်မှုထမ်းဖို့ ပေါ်တာဆွဲခံရသူတွေကိုတော့ ရက်တိုတိုသင်တန်းတွေပေးပြီး ရှေ့တန်း စစ်မြေပြင် သို့ ပို့ဆောင်ကာ တိုက်ပွဲအတွင်း အသက်ဆုံးရှုံးတာတွေလည်း များစွာရှိတယ်လို့ သိရပါတယ်။