စစ်ကော်မရှင်ရဲ့ ရွေးကောက်ပွဲကို အားပေးကူညီမှုနဲ့ သျှမ်းတောင်က အမျိုးသားဒီမိုကရေစီအဖွဲ့ချုပ် (NLD) ပါတီဝင် ၂ ဦးအပါအဝင်စုစုပေါင်း ၉ ဦးကို ထပ်မံထုတ်ပယ်လိုက်တယ်လို့ ပါတီဗဟိုက ဒီကနေ့မနက်မှာ ထုတ်ပြန်လာပါတယ်။
ထုတ်ပယ်ခံရသူတွေကတော့ ရှမ်းပြည်နယ် ရပ်စောက်မြို့နယ် အလုပ်အမှုဆောင်အဖွဲ့ဝင် ဒေါ်ခင်ညို၊ လင်းခေးမြို့နယ်ပါတီဝင် စိုင်းဆေဟန်၊ ဧရာဝတီတိုင်း ရေကြည်မြို့နယ် အလုပ်အမှုဆောင်အဖွဲ့ ဥက္ကဋ္ဌ ဦးဇော်မင်း၊ မြောင်းမြမြို့နယ် အလုပ်အမှုဆောင်အဖွဲ့ဝင် ဦးသန့်ဇော်ဝင်း၊ မအူပင်မြို့နယ် ပါတီဝင် ဒေါ်ခင်မျိုးသက် ၊ ရန်ကုန်တိုင်း လသာမြို့နယ် ပါတီဝင် ဦးဝင်းမြင့်သန်း ၊ ဒဂုံမြို့သစ်တောင်ပိုင်းမြို့နယ် အလုပ်အမှုဆောင်အဖွဲ့ဝင် ဦးသူရအောင်၊ ဒဂုံမြို့သစ်တောင်ပိုင်းမြို့နယ် ၂၁ ရပ်ကွက် အလုပ်အမှုဆောင်အဖွဲ့ ဥက္ကဋ္ဌ ဦးနေဝင်းထွန်း နဲ့ ဒဂုံမြို့သစ်တောင်ပိုင်းမြို့နယ် ရှမ်းတဲကြီးရပ်ကွက် အလုပ်အမှုဆောင်အဖွဲ့ ဥက္ကဋ္ဌ ဦးမြင့်ဦး တို့ ဖြစ်တယ်လို့ ထုတ်ပြန်ချက်အရသိရပါတယ်။
ထုတ်ပယ်ခံရသူ ၉ ဦးဟာ စစ်ကော်မရှင်ရဲ့ ရွေး ကောက်ပွဲမှာ ပါဝင်ယှဉ်ပြိုင်တာ၊ ရွေးကောက်ပွဲကို ကူညီတာတွေ ပြုလုပ်သလို ပါတီရဲ့ဆုံးဖြတ် ချက်နဲ့ စည်းမျဉ်းစည်းကမ်းတွေကို လိုက်နာခြင်းမရှိတာကြောင့်လို့ ထုတ်ပြန်ချက်မှာ ရေးသားထားပါတယ်။
ထုတ်ပယ်ခံရသူတွေထဲကလင်းခေးမြို့နယ်က စိုင်းဆေဟန်ဟာ စစ်ကော်မရှင်ရဲ့ ၂၀၂၅ ရွေးကောက်ပွဲမှာ ရှမ်းနဲ့တိုင်းရင်းသားများဒီမိုကရက်တစ်ပါတီ (ကျားဖြူ) ကိုယ်စားပြုပြီး လင်းခေးမြို့နယ် ပြည်သူ့လွှတ်တော်နေရာအတွက် ဝင်ရောက်ယှဉ်ပြိုင်နေတယ်လို့ သိရပါတယ်။
ပြီးခဲ့တဲ့ ဒီဇင်ဘာ ၂၅ ရက်နေ့ကလည်း ပါတီဝင် အယောက် ၂၀ ကို အလားတူ အမှုမျိုးနဲ့ပဲ ထုတ်ပယ်ခဲ့တယ်လို့
သိရပါတယ် ။
စစ်ကော်မရှင်ရဲ့ ရွေးကောက်ပွဲကို ပါဝင်ကူညီလို့ NLD ပါတီကနေ ထုတ်ပယ်ခံရသူ ၂၈ ဦးရှိပြီ ဖြစ်ပါတယ်။