စစ်ကော်မရှင်က ဦးဆောင်ကျင်းပတဲ့ ရွေးကောက်ပွဲ အပိုင်း ၃ ဖြစ်တဲ့ နောက်ဆုံးပိုင်းကို ဒီကနေ့ ဇန်နဝါရီလ ၂၅ ရက်မှာ သျှမ်းပြည်နယ်အတွင်းရှိ မြို့နယ် ၉ မြို့နယ်မှာ စတင်ကျင်းပနေပြီဖြစ်ပါတယ်။
သျှမ်းပြည်နယ်အတွင်းက မြို့နယ် ၉ မြို့နယ်ကတော့ မက်မန်း၊ ပင်လောင်း၊ ညောင်ရွှေ၊ ဖယ်ခုံ၊ မိုးနဲ၊ ကျေးသီး၊ မိုင်းရှူး၊ သီပေါနဲ့ ကျောက်မဲတို့ပဲဖြစ်ပါတယ်။
အခုကျင်းပတဲ့ ရွေးကောက်ပွဲအပိုင်း ၃ မှာ ရှမ်းနှင့်တိုင်းရင်းသားများ ဒီမိုကရက်တစ်ပါတီ(ကျားဖြူပါတီ) SNDPက မိုးနဲမြို့နယ်မှာ ပြိုင်ဖက်မရှိသဖြင့် ပြည်သူ့လွှတ်တော်အမတ်နေရာမှာ ကြိုတင်အနိုင် ရရှိထားပါတယ်။
ဒါ့အပြင် ဖယ်ခုံ၊ ကျောက်မဲနဲ့ မက်မန်း စတဲ့ ၃ မြို့နယ်တို့မှာလည်း ပြိုင်ဖက်မရှိလို့ ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ(USDP)က ပြည်သူ့လွှတ်တော် အမတ်နေရာမှာ အနိုင်ရရှိထားတာ ဖြစ်တယ်လို့ UEC ရဲ့ ထုတ်ပြန်ချက်အရ သိရပါတယ်။
ရွေးကောက်ပွဲ အပိုင်း ၃ ကို နိုင်ငံတဝန်းလုံး မြို့နယ် ၆၃ မြို့နယ် ကျင်းပမယ်လို့ အစောပိုင်းက ကြေညာ ထားပေမယ့် ကချင်ပြည်နယ်က မံစီနဲ့ မိုးမောက်မြို့နယ်မှာ ရွေးကောက်ပွဲ မကျင်းပနိုင်ဘူးလို့ ပြီးခဲ့တဲ့ ဇန်နဝါရီလ ၂၁ ရက်က UEC က ထုတ်ပြန်ထားတာဖြစ်တဲ့အတွက် မြို့နယ် ၆၁ မြို့နယ်မှာပဲ ကျင်းပနိုင်တာဖြစ်ပါတယ်။
Photo – Credit to owner (မိုးနဲနယ်မှာ ဆန္ဒမဲပေးနေကြတဲ့ ပြည်သူများ)