မကြာခင် ရက်ပိုင်းမှာ ကျင်းပတော့မယ့် စစ်ကောင်စီရဲ့ ရွေးကောက်ပွဲအား လေ့လာစောင့်ကြည့်ရန် အတွက် ယမန်နေ့ ညနေပိုင်းက ဘယ်လာရုစ်နိုင်ငံ ဗဟိုရွေးကောက်ပွဲကော်မရှင် ဒုတိယဥက္ကဋ္ဌ မစ္စတာ အလက်ဇီဘာရှန် ဦးဆောင်တဲ့ ရွေးကောက်ပွဲစောင့်ကြည့်လေ့လာရေးအဖွဲ့ဟာ ရန်ကုန်မြို့သို့ ရောက်ရှိလာတယ်လို့ စစ်ကောင်စီထုတ် သတင်းစာမှာ ဖော်ပြထားပါတယ်။
ရွေးကောက်ပွဲ စောင့်ကြည့်ဖို့ ရောက်လာတဲ့ နိုင်ငံတကာအဖွဲ့ထဲမှာ ဘယ်လာရုစ်အဖွဲ့က ပထမဆုံး ရောက်ရှိလာတာပဲဖြစ်ပါတယ်။
စစ်ကောင်စီရဲ့ ရွေးကောက်ပွဲကို အိန္ဒိယ၊ ရုရှား၊ ထိုင်း၊ ဖိလစ်ပိုင်၊ လာအို၊ နိုင်ဂျီးရီးယား၊ ပါကစ္စတန်နဲ့ နီပေါနိုင်ငံတို့ကလည်း လေ့လာစောင့်ကြည့်ဖို့ စာရင်းပေးထားတယ်လို့ သတင်းရင်းမြစ်ထံမှ သိရပါတယ်။
ယခုကျင်းပမယ့် ရွေးကောက်ပွဲဟာ လွတ်လပ်ပြီး တရားမျှတမှုမရှိတဲ့အတွက် နိုင်ငံတကာ အဖွဲ့အစည်းများ၊ ပြည်တွင်းနဲ့ တော်လှန်ရေးအင်အားစုများက ကန့်ကွက်ထားကြပါတယ်။
အခုလာမယ့် ဒီဇင်ဘာ ၂၈ ရက်မှာ ကျင်းပမယ့် ရွေးကောက်ပွဲ အပိုင်း(၁)ကို မြို့နယ် ၁၀၂ မြို့နယ် မှာ စတင်ကျင်းပသွားတော့မှာဖြစ်ပါတယ်။
နိုင်ငံတဝန်းလုံးရှိ မြို့နယ် ၃၃၀ ရှိတဲ့အနက် ရွေးကောက်ပွဲ မကျင်းနိုင်တဲ့ မြို့နယ် ၅၆ ခုရှိကာ ရွေးကောက်ပွဲ ကျင်းပမယ့် မြို့နယ် ၂၀၂ မြို့နယ်ထဲမှာရှိတဲ့ ရပ်ကွက်နဲ့ ကျေးရွာအုပ်စု ၂၉၃၁ ခုမှာလည်း ရွေးကောက်ပွဲ ပြုလုပ်နိုင်မှာမဟုတ်ဘူးလို့ ပြီးခဲ့တဲ့ ဒီဇင်ဘာလအစောပိုင်းက စစ်ကော်မရှင်က ထုတ်ပြန်ထားပါတယ်။