ဇွန်လ ၂၅ ရက်နေ့က စစ်ကောင်စီဟာ တိုက်လေယာဉ်နဲ့ ကရင်နီပြည် (ကယားပြည်နယ်) ဖားဆောင်းဒေသထဲက နန်းကစ်ရွာကို ဗုံးကြဲချလိုက်ရာမှာ အရပ်သား ၄ ဦး ပွဲချင်းပြီးသေဆုံးသွားတဲ့အကြောင်း ကရင်နီပြည် တောထဲတောင်ထဲက စစ်ဘေးရှောင်တွေကြား အခမဲ့ဆေးကုပေးနေတဲ့ Free Burma Rangers အဖွဲ့ David Eubank ကဖော်ပြခဲ့ပါတယ်။
ကရင်နီပြည် တောင်ပိုင်းတောထဲမှာ စစ်ဘေးရှောင် ၆ ထောင်နီးပါးလောက် ပုန်းနေရကြဆဲဖြစ်တယ်လို့ဆိုပါတယ်။
ကရင်နီပြည်နယ်စပ်ကနေ ထိုင်းနိုင်ငံဘက်ခြမ်း မယ်ဟောင်ဆောင်ခရိုင်၊ တမ်းဘွန်းဆောင်ဟင် မယ့်စလင်းမြို့နယ်နဲ့ တမ်းဘွန်းမယ့်ငေါဝ်း ခွန်ယုံးမ်မြို့နယ်ထဲကို ထွက်ပြေးသွားကြတဲ့ စစ်ပြေးဒုက္ခသည်ဆိုရင် စုစုပေါင်း ၄၇၉၈ ဦး ရှိတယ်လို့ Bangkok Post က မနေ့က ဖော်ပြထားပါတယ်။
ထိုင်းနယ်စပ်အာဏာပိုင်များ၊ ထိုင်းကြက်ခြေနီအဖွဲ့တွေ၊ ပရဟိတအဖွဲ့တွေက လူသားချင်းစာနာထောက်ထားတဲ့ နေထိုင်စားသောက်ရေး၊ တကိုယ်ရေကျန်းမာရေး၊ ဘေးကင်းလုံခြုံရေး၊ သန့်ရှင်းတဲ့ရေရရှိရေး ကိစ္စတွေကို ပံ့ပိုး ကူညီပေးနေတယ်လို့ သိရပါတယ်။
စစ်ကောင်စီဟာ Telenor၊ Ooredoo ဖုန်းလိုင်းတွေကိုလည်း ဖြတ်တောက်ထားသလို MPT ဖုန်းလိုင်းကိုတော့ အင်တာနက် ဖြတ်ထားပေမယ့် ဖုန်းလိုင်းတော့ ချန်ထားပေးတယ်လို့ ဒေသခံတချို့က Hsan Loi Voice ကို ပြောပါတယ်။
ကရင်နီပြည်တပ်မတော် KA နဲ့ KNDF ပြည်သူ့ကာကွယ်ရေးတပ်ဖွဲ့တွေ၊ ကလလတအဖွဲ့တွေ ပူးပေါင်းပြီး စစ်ကောင်စီကို ပြန်လည်ခုခံနေကြတာလို့ သိရပါတယ်။
ကရင်နီပြည်ဟာ မြန်မာနိုင်ငံမှာ အသေးငယ်ဆုံးပြည်နယ်တခုဖြစ်ပြီးတော့ စစ်တပ်ရဲ့ လေကြောင်းနဲ့ကုန်းကြောင်းကနေ ကြီးမားတဲ့ ထိုးစစ်ဆင်တိုက်ခိုက်မှုကို ခံနေရတဲ့ ပြည်နယ်တခုဖြစ်ပါတယ်။
