စစ်ကိုင်းတိုင်းဒေသကြီး အင်းတော်မြို့နယ်တွင် (၅) ရက်အတွင်း ကျေးရွာ (၆) ရွာရှိ လူနေအိမ်များကို စစ်ကောင်စီတပ်မီးရှို့ခဲ့ဟု Indaw Revolution ဆို

စစ်ကိုင်းတိုင်းဒေသကြီး အင်းတော်မြို့နယ်တွင် စစ်ကောင်စီတပ်မှ ရွာ (၆) ရွာရှိ လူနေအိမ်များကို မီးရှို့ခဲ့ပြီး နေအိမ် (၁၀၀) ကျော် မီးလောင်ပျက်စီးခဲ့ကြောင်း Indaw Revolution က ယနေ့ ဒီဇင်ဘာလ(၂၁) ရက်နေ့တွင် ထုတ်ပြန်ကြေညာခဲ့သည်။

ဒီဇင်ဘာလ (၁၆) ရက်နေ့မှ ဒီဇင်ဘာလ (၂၀) ရက်နေ့အတွင်း နေအိမ်များအပြင် စပါးကျီများပါ မီးရှို့ခဲ့ခြင်းဖြစ်ကြောင်း ၎င်းတို့ထုတ်ပြန်ချက်တွင် ပါရှိသည်။ မီးရှို့ခံရသည့် ကျေးရွာများမှ ဂျုံးဂျုံးကျ ရွာသစ်၊ ဂျုံးဂျုံးကျရွာမ၊ ပိန်းအင်း၊ မအူကုန်း၊ စက်တောကုန်း ကျေးရွာများဖြစ်သည်။

ဒီဇင်ဘာလ (၁၈) ရက်ကလည်း စစ်ကောင်စီတပ်မှ ပိန်းအင်းရွာ အနီးတွင် ဒေသခံပြည်သူ (၄) ဦးကို ဖမ်းဆီးသတ်ဖြတ်ခဲ့ပြီး ရွာဘုန်းကြီးကျောင်းအတွင်း မြှုပ်နှံခဲ့ကြောင်း သိရသည်။

ယမန်နေ့ ဒီဇင်ဘာလ (၂၀) ရက်နေ့တွင် အင်းတော်မြို့နယ် စက်တော်ကုန်းရွာကို စစ်ကောင်စီအင်အား (၁၀၀) ကျော်ခန့်မှ ကျေးရွာလူနေအိမ်များကို မီးရှို့ခဲ့ပြီး အိမ်ခြေ (၄၁) အိမ်နှင့် စပါးတိုက် (၃၀) မီးလောင်ပျက်စီးခဲ့ကြောင်း Indaw Revolution က ဖော်ပြခဲ့သည်။

လက်ရှိတွင် စစ်ကောင်စီတပ်များ နတ်မဟုတ်ကြီးရွာကို ရောက်ရှိနေပြီး ဖားပန်နှင့် ပင်ဝယ်ကြား တောထဲတွင်လည်း နန့်စီးအောင်မှ ဆင်းလာသည့် စစ်အင်အား (၁၀၀) ကျော်ခန့်ရှိကြောင်း သိရသည်။

စစ်ကောင်စီတပ်နှင့် KIA+PDF ပူးပေါင်းအဖွဲ့တို့ စစ်ကိုင်းတိုင်းဒေသကြီးတွင် ဒီဇင်ဘာလ (၁၆) ရက်နေ့ကစတင်ပြီး တိုက်ပွဲများ ပြင်းထန်စွာ ဖြစ်ပွားခဲ့ကြောင်း သတင်းရရှိသည်။

credit photo & original uploader

#HsanLoiVoice
https://instagram.com/hsan.loivoice?igshid=YmMyMTA2M2Y=
https://hsanloivoice.org/