အင်အားပြင်းငလျင်ကြောင့် ထိခိုက်ပျက်စီးခဲ့တဲ့ နေပြည်တော်ရှိ လွှတ်တော်အဆောက်အဦတွေကို ဖြစ်နိုင်သမျှ အမြန်ဆုံး ပြန်လည်တည်ဆောက်ရန်နဲ့ သတ်မှတ်ကာလအတွင်း အချိန်မှီပြီးစီးအောင် ဆောင်ရွက်ရန် လိုအပ်တယ်လို့ စစ်ကောင်စီဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် က တာဝန်ရှိသူတွေကို ညွှန်ကြားလိုက်ပါတယ်။
ငလျင်ဒဏ်ကြောင့် ပျက်စီးသွားခဲ့တဲ့ နေပြည်တော်ရှိ လွှတ်တော်အဆောက်အဦများကို ယမန်နေ့ မေလ ၂၅ မွန်းလွဲပိုင်းက သွားရောက်ကြည့်ရှုစစ်ဆေးခဲ့ရာမှာ ထိုသို့ညွှန်ကြားတာဖြစ်ပါတယ်။
ပျက်စီးသွားတဲ့ အမှတ်(၁)ဂိတ်အဝင်ကြိုးတံတားနှင့်မုခ်ဦး၊ ပြည်ထောင်စုလွှတ်တော်အဆောက်အဦ၊ ပြည်သူ့ လွှတ်တော်အဆောက်အအုံ၊ ဇမ္ဗူသီရိခန်းမဆောင်နဲ့ အမျိုးသားလွှတ်တော် အဆောက်အဦ တို့ကို သွားရောက်စစ်ဆေးခဲ့ကြတာပါ။
စစ်ခေါင်းဆောင်သည် ၎င်းကပြုလုပ်မယ့် ရွေးကောက်ပွဲနဲ့ အချိန်နီးကပ်လာလို့ လွှတ်တော်ပြန်လည် မစတင်မှီအချိန်မှာ ပြုပြင်တည်ဆောက်ရေးလုပ်ငန်း မပြီးမှာကို စိုးရိမ်ပုံရှိနေတယ်လို့ နိုင်ငံရေး လေ့လာသူအချို့က သုံးသပ်ထားပါတယ်။
ရွေးကောက်ပွဲကို ၂၀၂၅ ခုနှစ် ဒီဇင်ဘာလ(သို့မဟုတ်) ၂၀၂၆ ခုနှစ်၊ ဇန်နဝါရီလ လဆန်းပိုင်းမှာ အစောဆုံးကျင်းပသွားမယ်လို့ ငလျင်မလှုပ်ခင် မတ်လ ၇ ရက်နေ့က ပြောကြားခဲ့တာဖြစ်ပြီး သွားလေရာ ပြည်တွင်း/ပြည်ပ ခရီးစဉ်အတွင်းမှာလည်း ရွေးကောက်ပွဲကျင်းပရန်ကိစ္စနဲ့ ပက်သက်လို့ စစ်ခေါင်းဆောင် မင်းအောင်လှိုင်က မကြာခဏ ပြောလေ့ရှိပါတယ်။
